SMAC a ricibi permiso general di gobierno pa organisa Carnaval 63

ORANJESTAD – Dilanti di miembronan di directiva di Stichting Maneho Aruba su Carnaval (SMAC) y miembronan di prensa, Minister President Mike Eman a firma diaranson merdia e documento cu ta autorisa SMAC pa organisa tur actividad cu ta forma parti di Carnaval 63 den aña 2017. Tanto e entidad como Gobierno di Aruba ta satisfecho di por bisa cu ta reina un harmonia entre tur partido y esey ta duna un expectativa grandi cu e proximo temporada di Carnaval lo ta uno masha exitoso.

“Durante ultimo añanan tabatin reto den e maneho di Carnaval,” asina Eman a bisa indicando cu “ta importante pa yega na trankilidad den maneho di Carnaval pa asina tur forsa, energia y dedicacion por ta enfoca riba maneho di Carnaval y no wordo desorienta.” Eman ta kere cu awo cu SMAC y Musica ta riba e mesun liña, ta brinda hopi mas trankilidad pa e por firma e permiso.