Caso sumario Orozco (Señor Frog's) vs SIAD awe tardi

ORANJESTAD - E representante di e compania cu comercialmente ta opera como 'Señor Frog's', Daniel Orozco, ta hiba gobierno (SIAD) corte awe tardi. Abogado pa Orozco, Joselin Croes a confirma esaki pa NoticiaCla.com. E intencion ta pa pidi hues pa forsa SIAD revoca e probicion di biahe cu tin pa Orozco desde momento cu ela purba bandona Aruba recientemente. For di e representantenan di e trahadonan, Starr Ramos, e portal aki a compronde cu tur 32 trahado lo ta presente awe tardi. 

COSNAN PENDIENTE

Ramos a mustra cu nan tin miedo cu si hues revoca e prohibicion, nan ta perde tur e chens pa haya algo di e compania. Segun Ramos, a pidi pa un declaracion por escrito cu ta bisa cu e compania 'ta sigui paga te ora cu e faillisement ta final'. "Ainda (Joselin Croes) no a duna nos (e declaracion ey)" Ramos a bisa. Tambe a priminti cu e director ta bay bin, pero tampoco no a sosode ainda. "Nos tin miedo cu Daniel mag di bay, nos nunca ta bay ni wak ni haya niun hende mas (di e compania pa para responsabel)" Ramos a finalisa bisando. E caso ta tuma lugar awe tardi 3'or.