Bikker: Kier forma un solo partido cu Otmar Oduber

ORANJESTAD - Andin Bikker diaranson mainta a confirma cu e ta den combersacion cu Otmar Oduber pa yega na un tipo di acuerdo pa uni den un solo partido. "E detayes lo wordo acorda den un protocol den e proximo dianan, mi a haya mandato di partijraad pa bay sinta na mesa y werk uit un cooperacion pa por participa conhunto na eleccion 2017" Bikker a bisa NoticiaCla.com despues. E intencion ta pa forma un solo partido cu 'un liderazco comparti' manera cu Bikker mes a confirma anteriormente den su conferencia di prensa. 

MANDATO PA TRAHA CU OTMAR

Bikker a confirma cu ela haya mandato di su partido pa explora e posibilidad pa forma un tipo di aliansa y of unidad cu e plataforma di forsa nobo di Otmar Oduber. Esaki mester desemboca den un lista, unu cu lo participa den e proximo eleccion na 2017. Segun Bikker, analisando e resultado di eleccion ultimo, a determina cu hunto nan por saca por lo menos 4 asiento den e proximo eleccion. "Unidad ta haci forsa" Bikker a bisa, y e meta ta pa finalmente ta den gobierno. Y esaki ta un forma sigur di logra esaki. 

OTMAR RIBA E TOPICO 

"Enberdad combersacion a y ta tumando lugar". Asina Otmar Oduber a reacciona pa NoticiaCla.com diamars mainta riba e noticia cu a keda publica den e matutino Diario mainta. E noticia tabata cu 'Otmar y Andin a reuni riba posibel fusion di e dos partidonan'. Oduber pues a bisa cu si. Cu esaki Oduber a admiti cu tin combersacionnan andando pues cu entre otro Andin Bikker di Democracia Real. Mes momento Oduber ta mustra cu 'tin combersacionnan andando cu varios hende pareu' y no solamente Bikker.