Stichting Verstandelijke Gehandicapten Aruba tin director nobo

ORANJESTAD – “Stichting Verstandelijke Gehandicapten Aruba (SVGA) tin un director nobo pa sigui cu e trabounan importante pa e fundacion, pero tambe pa e sector aki", asina Minister Paul Croes di Asuntonan Social a anuncia. Els van Homelen ta tuma e responsabilidad.

Despues cu Tuyo Werleman a haci e trabou aki pa hopi aña y a bay cu un pension bon mereci, e fundacion cu ta subsidia pa Gobierno di Aruba bou di Ministerio di Asuntonan Social, mester a yega na un nombracion nobo. Directiva a haci e proceso di solicitud y a haya varios candidato, finalmente e escogencia a bay pa Sra. Els Van Homelen. 

 Croes a haci e anuncio aki despues cu conseho di Minister a aproba e candidato presenta pa e directiva. "Cu e nombracion aki nos ta garantisa continuidad den e trabounan importante di e fundacion. Bandi di esaki mi lo kier accentua algun aspecto tambe di e maneho dirigi riba e grupo special aki. Mi lo sigui cu e maneho pa mas participacion di e grupo aki riba e mercado laboral y tur otro sector aki na Aruba", Minister Paul Croes a mustra. 

Croes tabatin palabra di elogio pa Werleman kende pa mas di 30 aña a dedica na e grupo asina importante aki y ta garantisa comunidad cu e trabounan lo sigui pa yuda tur esnan special na Aruba. Tambe ta desea  van Homelen hopi exito den su cargo nobo, reafirmando na mesun momento su compromiso personal y di su Ministerio na e grupo aki di nos comunidad.