Animalnan cu a drenta Aruba 'ilegal' ainda den cuarentena

ORANJESTAD -  E animalnan cu a drenta Aruba ilegal dia 23 di october ultimo ainda nan ta den cuarentena.  Asina servicio Veterinario di Aruba a informa den un comunicado. Ta trata di 7 cacho, 2 macaco (pigmy marmoset), 2 toucan, 4 lora, 1 ocelot, 1 jaguarundi y 6 morcoi. Berdad ta cu 10 toucan a drenta Aruba, pero considerando e condicion cu tur e animalnan tabata den estado di salud malo (malnutri y deshidrata) 8 di nan a fayece den menos di 48 ora. Tur animal cu a drenta debil ta mehorando di salud, tur tin acceso na cuido veterinario si den caso esaki ta necesario. 

MANDA CACHONAN BEK VENEZUELA

Ainda ta evaluando y studiando e forma pa manda e cachonan bek pa Venezuela na un manera responsabel. Importacion di cacho for di Venezuela ta prohibi door cu Venezuela tin caso di rabies y schroefworm. Solamente den caso di mudansa por pidi pa haci un excepcion riba e ley cumpliendo cu rekisitonan estricto pa evita cu e malesanan contagioso aki drenta Aruba. 

PROTECION PA TRATADO CITES

Tur otro animalnan cu ta den cuarentena ta proteha mundialmente pa e tratado di CITES. Cu otro palabra aunke e prome opcion di ley ta pa manda nan bek, tin mas opcion pa nan, cu no ta e caso pa e cachonan confisca. Servicio Veterinario ta keda duna informacion di bienestar di e animalnan cu ta tarea prinicipal di Servicio Veterinario den e caso aki.