Gobernador a huramenta Richard Arends como minister

ORANJESTAD - Richard Arends diamars atardi a huramenta dilanti su exelencia Gobernador Fredis Refunjol como e proximo minister di Economia y Comunicacion. Arends a considera esaki un 'honor y privilegio'. "Tin un diferencia grandi ora cu bo cruza e liña sagrado entre consehero y mandatario" Arends a bisa, refiriendo na su funcion anterior di consehero. Durante e ultimo 7 añanan Arends a fungi como consehero principal di minister Mike de Meza y tambe como consehero pa prome minister Mike Eman. De Meza ta cambia di cartera y ta encarga awor cu Turismo, Medio Ambiente y Energia. E ultimo dosnan e tabatin caba y ta haya Turismo aserca pero ta perde Economia y Comunicacion."E energia ey, e gana t'ey, y e motivacion t'ey" Arends a sigui bisa despues. El a sigura cu e funcion aki ta meramente pa e 9 lunanan cu falta di gabinete Mike Eman II y cu e ta fungi como un 'vakminister' y no un politico activo.