SUBWAY Palm Beach lo keda cera te proximo aviso

ORANJESTAD – Varios parti di Aruba a experiencia awasero fuerte siman pasa. Un di e areanan seriamente afecta tabata e vecindario di Palm Beach, e dia di e yobida fuerte aki ja caba for di trempan  gerencia di Subway a dicidi pa cera e localidad y manda su trahadonan cas pa nan propio seguridad.

Mirando cu e localidad di Subway na Palm Beach ta keda cerca di e ‘pompstation’, na dado momento bisiñanan y comerciantenan a ripara cu e gasolin tambe a plama y mescla cu e awa stanca, creando asina un situacion peligroso tambe pa un y tur den e vecindario.  

“Nos ta agradecido cu nos trahadonan di Palm Beach ta ok pero pa awo nos a dicidi di sera Subway Palm Beach te un proximo aviso. Mientras tanto pa nos fiel clientenan di Subway Palm Beach, nos ta invita nan pa bishita Subway Alhambra of Subway Paradera cu ta e dos di mas serca. Nos lo traha duro awor pa asina nos localidad di Palm Beach por habri mas pronto cu ta posibel bek pa sirbi nos fiel cliente nan di e pueblo di Noord ”, asina gerente di mercadeo, Tai–Foo Lee a informa. 

Aunke tur e localidad na e centro comercial tabata practicamente bou awa, gerencia di Subway ainda no por a confirma e gravedad di e daño causa na nan localidad di Palm Beach y pesei lo tin esaki sera te proximo aviso.

Subway ta gradici henter comunidad pero muy empraticular nos fiel cliente nan di Subway Palm Beach pa e comprension 

Pa tur esunnan cu ta interesa pa haci pedido of pregunta por yama cualkier otro localidad di Subway, sea Cura Cabai (588-4388), Sta. Cruz (585 1277), Paradera (582 1077), Alhambra (280 1277), Dakota (583-3877) of Renaissance Market Place (280  4177).