OM cu sosten pa FHMD y ta considera violencia domestico inacceptable

ORANJESTAD - Ministerio Publico ta sostene e obhetivonan di FHMD y ta condena tur forma di violencia domestico. Hasta mucha por bira victima di e tipo di violencia aki, sigur si nan wak e den nan cas. Bao violencia domestico ta compronde violencia fisico, sexual, psicologico of economico cu ta tuma lugar den cas of entre (ex-)parehanan. 

Procurador-General di Aruba, mr Alexander van Dam, tabatin un encuentro recientemente cu e directiva di Fundacion pa Hende Muher den Dificultad (FHMD). El a papia entre otro, cu e directrice di FHMD, señora Suzi Kock. E Procurador-General a keda profundamente impreciona cu e meta, e trabao y e compromiso di e fundacion. FHMD ta traha na favor di muhernan cu ta victima di violencia domestico y relacional. E fundacion ta maneha tambe un cas di refugio pa muhernan maltrata y nan yiunan. 

Violencia domestico mester wordo evita y combati. Sospechosonan no mag di sali liber. Si ta na Ministerio Pubico, nan lo no sali liber tampoco. Ministerio Publico kier duna un señal cla cu maltrato den cualkier forma cu ta, ta inacceptable. 

Ministerio Publico ta para tras di e campaña di concientizacion di FHMD tocante violencia domestico, yama ‘Orange Aruba 2016’.