Corte a declara Tiara Air bancarota awe mainta

ORANJESTAD - Corte a declara e compania aereo Tiara Air bancarota awe (dialuna) mainta. Abogado pa e grupo cu ta representa e trahadonan, Hose Figaroa a confirma esaki awe mainta pa NoticiaCla.com. Den e sentencia, huez ta mustra cu basa riba e informacion ricibi den e caso trata recientemente, a resalta cu Tiara Air no a haci ningun pago despeus di un acuerdo di 20 di november 2015 pa cu e surgeance van betaling. Ademas mientras cu ta bisa cu tin fondo pega na Venezuela, Tiara no por a bisa si of ki dia e fondonan aki por wordo pasa riba su cuenta, y asina cancela e debe pendiente. Cu esaki den mente, huez a declara e compania den estado di bancarota. Asina e aeroliña ta stop di existi lamentablemente. 

E CASO 

Un grupo di 6 ex trahado di Tiara Air a hiba e compania corte dialuna, cu e meta pa laga hues declara e compania bancarota. E CEO di e compania Alejandro Muyale a confirma esaki pa NoticiaCla.com y mes momento a lamenta e hecho aki tambe. Segun Muyale, e ta lamenta cu mientras cu tin 150 ex trahado y 300 y pico creditor cu si kier pa e compania sigui, pendiente pago pega na Venezuela, un grupito minimo kier caba cu e compania. 

SUMA PEGA NA VENEZUELA 

E suma cu segun Muyale ta pega na Venezuela, ta monta riba 20 miyon dollar, cu ta placa di benta di 15 luna di pasashi entre 2013 y 2014. Segun Muyale cu si pidi bancarota, e chens pa reclama e placa pega na Venezuela, ta bira hopi mas chikito. E CEO ta sigui kere cu Venezuela mester paga e suma, basa riba acuerdonan bilateral entre Aruba y Venezuela. Y basa riba e hecho cu a cumpli cu tur e reglanan, tanto solicitudnan registra y oficial, documentonan cu gobierno di Venezuela ta reconoce e debenan pendiente,  Muyale ta cu nan lo tin paga esaki pronto. 

UZA PLACA DEN FORMA ROBES

Un di e criticanan cu e ex trahadonan a trece dilanti ta cu Tiara Air a ricibi placa dado momento, pero cu a uza e placa aki den un forma no corecto y a paga otro cos en bes di cancela e debe cu e grupo di ex trahado. "Mi ta compronde cu nan por expresa asina, pero porta ta falta di informacion. Pero esey niun rato so (ta berdad)" Muyale a sigura e portal aki. De hecho, ora cu a haci e presentacion di e plan di restructuracion, a dicidi cu tur e empleadonan ta wordo separa di tur e creditornan (cu a tuma descuentonan grandi como pago), di e trahadonan cu lo haya nan placa completo cu ta debe nan. "P'esey a dicidi cu ta bay paga nan pronto. Pero lamentablemente e planesnan no a bay manera cu nos a kere, y p'esey nos ta na e punto aki unda cu nos a bisanan cu e cen nan lo hay'e" Muyale a sigui bisa. E ta sigura cu den pasado, cualkier cen cu a drenta, tabata cen cu a bay directamente na re-start e operacion, y na hendenan cu tabata trahando. "Pero cu no tin prioridad pa paga nan (e ex trahadonan), esey no ta cuadra cu realidad. E ta un prioridad sigur sigur. Y esey lo mi sigui te ora cu caba paga cada un di nan. E ta hopi importante pa reken af e cos ey pa mi reputacion, pa mi cara riba e isla chikito akinan, cu gran mayoria di hende conoce'mi." El a sigura cu e no lo stop e esfuersonan. 

AOC CANCELA

E compania actualmente no ta den operacion. Esey ta nifica cu e no ta generando entrada, pero tampoco debe. Mirando e situacion cu nan ta aden, NoticiaCla.com tin confirma cu e compania a perde su Aircraft Operating Certificate (AOC) tambe, pues nan no por bula mas tampoco. Y pa aworaki, esey no ta un prioridad pa Muyale. E prioridad ta aworaki meramente logra haya e placa pega na Venezuela, pa por paga e debenan cu tin. "Den caso cu mayan Venezuela paga, y den caso cu tin un chens cu por pone un grupo hunto y restart, porta lo haci'e. Pero e no ta riba lista di prioridad aworaki. Prioridad aworaki ta pa e cen drenta y paga tur e creditornan" Muyale a sigui bisa. Ademas ela sigura e portal aki cu no ta ela laga e compania bay bancarota, y a haci tur lo posibel pa e no bay bancarota. "Poco compania lo a wanta un golpi duro asina caminda 15 luna di bo bentas ta wordo reteni", Muyale a finalisa bisando. Hues ta dicta sentencia dia 28 di november proximo. Lesa e sentencia aki.