Wever: Glenbert a expresa su desicion y un recomendacion pa fraccion

ORANJESTAD - "Glenbert Croes den e programa na Telearuba a expresa su decision y un recomendacion cu e kier duna na fraccion ora ta asina leu". Asina lider di partido geel Evelyn Wever Croes a reacciona na NoticiaCla.com diadomingo. E no tabata na altura di e declaracion di miembro di su fraccion Glenbert Croes riba e asunto di amienda. "Su decision ta basa riba principalmente e forma con gobierno di AVP no a carga su responsabilidad pa cu e tema aki, y a laga MEP, especialmente Glenbert Croes y ami, carga e peso" Wever a bisa. Wever a papia cu Glenbert (Croes) awe nochi riba e tema. 

E SITUACION

Segun Wever su combersacion cu Croes, loke cu Glenbert tabata kiermen, ta e loke a sosode cu e amienda tabata "un acto iresponsabel y cobarde di Mike Eman pa no carga su responsabilidad despues. Su decision ta tambe basa riba e forma con pueblo te awe ainda ta husga nos como si fuera ta amienda di Desiree Croes nos a aproba". Segun Wever, e fraccion di MEP tabata contra e amienda di Desiree y e decision di Glenbert ta basa riba e necesidad pa aclarea esaki. "E ta bay aclarea mayan den persconferentie pasobra e no a bespreek esaki ainda den fraccion di MEP. E kier mira AVP, Mike Eman y Desiree Croes carga nan responsabilidad". Y finalmente, Wever a sigura cu "den nos fraccion riba e topico aki nos cada un tabata liber den nos votacion. Awor bo ta mira un biaha mas cu den MEP cada ken tin derecho di expresa su propio opinion" Wever a finalisa bisando. Mas prome de Sousa, reaccionando riba Glenbert Croes, a mustra su decepcion cu e declaracion haci.