De Sousa : Decepciona cu Glenbert Croes pa retiro sosten amienda

ORANJESTAD - "Hopi decepciona, pero ya no por spera otro di hende cu falta curashi". Asina parlamentario pa partido AVP Desiree de Sousa Croes a reacciona pa NoticiaCla.com riba e declaracion di colega parlamentario Glenbert Croes. Croes algun rato prome den e programa 'Al Caso' na Telearuba a informa cu e y resto di MEP lo retira nan sosten na e amienda riba 'union civil'. E amienda a keda entrega pa de Sousa Croes y ta e autor di esaki como tal. "Dieptriest. Pero, mas cu tur cos mi ta hopi decepciona" e parlamentario di e partido berde a sigui bisa. "Politico cu por haci un diferencia grandi pa un grupo minoritario den nos comunidad, ta haya culio". Riba su pagina di Facebook el a pone e quote di Mahatma Gandhi "A coward is incapable of exhibiting love; it is the prerogative of the brave", esta un cobarde ta incapaz pa exihibi amor. E ta e prerogativo di un e balente.

DECLARACION GLENBERT

Awenochi, via Tele Aruba, den programa ALCASO, Glenbert Croes a anuncia cu e (y posiblemente henter fraccion di MEP den Parlamento, ta kita sosten pa amienda di 'union civil' recien introduci durante tratamento di ley di codigo civil. Croes a admiti cu ta un error el a cometi y cu nan lo vota contra ora cu e mocion converti su mes den un ley. Cu esaki, ta mustra cu e amienda ta cay mirando cu no tin sosten mas di mayoria. Esaki pasobra algun tempo atras, lider di fraccion di Democracia Real Andin Bikker tambe a hala su sosten atras. 

PAKICO AWO

Croes durante e programa, a duna e moderador Rafael Croes e 'primicia' cu e ta coregi su votamento y di su partido. "Mi por dunabo e noticia cu nos a tuma, cu e 7 parlamentarionan di MEP, si e invoeringsverordening mester bin, nos ta vota contra amienda di consensus tranca, codigo civil tranca" Croes a declara. E ta mustra cu no por ta asina cu AVP ta keda keto riba e tema y MEP ta e unico cu ta bin dilanti. Ora cu (Rafael) Croes a puntr'e si e votamento e tempo ey tabata un eror, Croes a contesta "100% e tabata un eror". E ta mustra cu e motibo ta cu e tempo ey MEP no tabatin e oportunidad pa presenta e cambionan den nan seno (achterban). Si nan tabatin e chens ey, nan lo a tende e momento ey cu e achterban tabata contra. 

VOTAMENTO RIBA AMIENDA

Durante e votamento tabatin hopi tension den sala e tempo ey. Mientras cu fraccion di AVP tabata practicamente completo (11) (faltando 1 parlamentario) den sala, tabatin solamente 6 cu a vota pro, y 5 a vota contra. Esnan cu a vota pro tabata Mervin Wyatt Ras, Chris Dammers, Norman Roos, Jeffrey Kelly, Desiree de Sousa Croes, Rene Herde. Arends Reyes den un carta, a mustra su sosten pa e amienda, pero no ta conta pasobra no a vota 'fisicamente'. Fraccion di oposicion MEP tabatin 7 miembro di cual solamente 3 a vota pro, y e resto a bandona sala pa no vota. Esnan di MEP cu a vota pro tabata e lider Evelyn Wever Croes, Glenbert Croes y Chris Romero. Esnan cu a bandona sala tabata Guilfred Besaril, Xiomara Ruiz Maduro, Adi Thijsen y Dangui Oduber. Pa fraccion di PDR Andin Bikker a vota pro, y e fraccion independiente di Marisol Lopez Tromp tambe a vota na fabor. Cu e cambionan awor, y tumando palabra di Croes di diadomingo anochi, e votamento awor lo ta cu 4 voto menos (tres di MEP y 1 di PDR), cu no ta suficiente mirando cu di AVP a vota solemente 6 na fabor. Lider di partido MEP Evelyn Wever no tabata disponibel pa comentario ainda.