'Atrobe' ta priminti solucion pa problema di inundacion

ORANJESTAD – Gobierno diadomingo un biaha mas den un comunicado a 'priminti' cu ta bay soluciona e problema di inundacion na Madiki y Palm Beach. Un biaha mas, pasobra ambos ta lugarnan cu den pasado caba gobierno a priminti caba, despues di pasa cas pa cas y consola e habitantenan. Despues di e bishita recien, gobierno un biaha mas a priminti cu ta bay haci mescos. No ta conoci kico a pasa cu un biaha mas (of atrobe) Madiki a haya su mes den un situacion asina manera antes. Ta conoci cu den pasado recien, gobierno a inverti basta placa pa drecha e situacion na Madiki. Pero mirando cu ta hopi awa mes a cay, ni maske cuanto solucion a presenta, e awa ta keda afecta e casnan.  

CASNAN DEN AREA TA MAL SITUA

Loke gobierno a admiti tambe, ta cu mientras cu riba dje, nan ta priminti di amplia e infrastructura existente, ta e ubicacion di e casnan mes ta e problema di e inundacion. Segun e comunicado di gobierno, por bin cu solucion "aunke semper e casnan cu ta situa den un area abou lo sigui haya problema". Pa loke ta Noord y specificamente Palm Beach, e desaroyo aproba pa gobierno mes a trece cu awor tin problema pa e awa bay. Gobierno den su comunicado, ta mustra cu "e desaroyo, principalmente den area di Noord, a trece cu ne hopi construccion y ainda tin un demanda halto tanto pa e parti comercial como e parti di vivienda". Mientras cu tin construccion ta sigui haya problema cu awa y e casnan cu a wordo traha hopi aña pasa, bou di e nivel di caminda of di awa di lama, ta haya problema. Na Palm Beach, riba e Boulevard tabatin desaroyonan grandi cu a trece cu e rooinan cu tabata core automaticamente a wordo desvia, a traha rooinan cu mester guia e awa y transporta esaki te na Bubaliplas. Pero e cantidad di awa cu a cay siman pasa, no por a maneha e fluho debidamente. “Nos ta haciendo un analisis. Tin areanan unda cu nos a constata cu e entrada pa e canal ta chikito cu mester wordo amplia y tin canalnan nobo cu por wordo traha pa alivia e situacion. Y gobierno un biaha mas ta papia cu un biaha mas "tin un grupo di ingeniero analisando e situacion tanto di Palm Beach como Madiki, pa nos ta mas miho ainda prepara". Y nan ta consciente di e problema. "Pero manera cu e awa a cay, 70 mm di awa den apenas 4 ora ta algo cu nos no a haya henter aña. Ta dificil pa prepara pa algo asina" e comunicado ta sigui bisa.

TA SIGUI AMPLIA INFRASTRUCTURA

Gobierno ta sigui bisa tambe cu no obstante cu tin problema door di e construccion extra, nan lo sigui cu esey tambe. "Sinembargo nos por sigui amplia nos infrastructura y lo bay haci'e tambe" e comunicado ta sigui bisa. E mandatario a agrega cu ta bay presenta un plan proximamente na Conseho di Minister pa mira con por ehecute. A bisa cu e forma con e awa a cay ningun pais, cu tin infrastructura, por a procesa esaki asina rapido, manera ora cu tin un yobida grandi normal. “Pero esaki no ta significa cu nos no por haci mas. Nos lo mester haci mas y esey nos ta haciendo cu e analisis tumando luga.”