Gobierno: Flash flood watch extendi te dialuna merdia

ORANJESTAD - Gobierno ta extende e flash flood watch te cu dialuna 3 pm. Un flash flood watch kiermen cu tin chens cu durante awacero awa por causa molester rato-rato na caminda e awa no por baha liher dor cu e tera ta satura.

Un area di presion abou lo por desaroya dialuna (figura 1+2)  den nos vecindario. Esaki por pone cu e biento por varia di direcion. E cambio di biento combina cu un disturbio den nivelnan mas halto di atmosfera y tambe humedad por crea areanan di awacero entre dialuna marduga pa dialuna mainta. Durante e periodo aki por hanja e flash floods si awa yobe duru.

Diamars mayoria di humedad lo bai ta keda oost y noord di Aruba. pues e condicion pa awacero lo ta menos. Tuma nota tambe cu dor cu e biento lo ta debil y por varia di direcion e aire lo sinti basta benauwd. Aunque cu biento por boltia, no ta anticipa niun effecto ariba lama banda di hotel. E flash flood watch ta termina 3'or di atardi.