Situacion a normalisa dilanti porta di waf

ORANJESTAD – Situacion den porta di haf a normalisa den un tempo record. Esaki gerencia di Aruba Ports Authority NV a confirma diabierna mainta. Y pa logra mantene e situacion asina, conhuntamente cu autoridad di e.o. polis, a implementa tres regla cu ta drenta na vigor mesora. Entre nan, e destinacion di e lugar di parkeo dilanti waf, te na ubicacion di un booth pa Visibility Team na e sitio, pa mustra mas presencia durante bishitanan crucero.

E situacion recien caotico cu a presenta dilanti porta di haf durante bishita crucero, a pone cu mester a tuma accion mesora. E cooperacion tabata entre APA y autoridad di gobierno manera polis di Bario, Visibility Team, DYP y DOW. Hunto nan a mehora e situacion caotico den un tempo record cu a pone cu cos ta mustra ‘normal’ atrobe na entrada di haf.

Entre e reglanan introduci for di diabierna, ta inclui cu e lugar di parkeo pabou di entrega di haf ta destina pa busnan di tour operator pafo di waf ora cu tin barco crucero den haf. E lugar di parkeo ey ta keda te ora cu cuminsa cu construccion di e Plaza cu ta bin na entrada di e waf. Motibo di e cambio ta pasobra cu e situacion anterior, e tabata causa aglomeracion di e tour busnan. Awor esey ta regla miho. Ora cu no tin barco crucero, e lugar di parkeo ta habri pa publico en general. Riba e website di APA www.arubaports.com/main/cruiseship-schedules/ por mira e yegada di e barconan. Tambe APA lo pone un booth disponibel pa acomoda e presencia continuo di personal di Visibility Team ora cu tin barco crucero den waf.