Occidental Grand hotel ta bira Barceló Aruba awe

PALM BEACH - Un aña despues cu Barceló Corporation Empesarial a cumpra Occidental Grand, ta te awe numa e ta cambia oficialmente di nomber y ta bira 'Barceló Aruba'. Esaki lo sosode como parti di nan 'branding' cu ta tumando lugar internacionalmente. Basicamente e ta cambia nomber, completo cu ceremonianan respectivo. Tur esey ta tuma lugar awe tardi den presencia di un lista di invitado impresionante, manera cu NoticiaCla.com por a compronde. For di gerente nobo di hotel, te na gobernantenan local y demas invitado, tur lo ta presente.

CAMBIO DI DOÑO

Tabata aña pasa mitar di juni (18 di juni 2015) cu e anuncio a bin y cu NoticiaCla.com a trece como primicia e tempo ey. E anuncio tabata cu Barcelo Corporation Empesarial a informa cu nan a yega na un acuerdo cu BBV pa cumpra 57,5% di e capital den Occidental Hotels Management, cu ta e compania madre di Occidental Hotels & Resorts. Barcelo mes ta un nomber hotelero. Aruba a haya un mencion special, den e sentido cu Barcelo awor por ofrece e mercado aki tambe na su clientela.

UNICO DOÑO

Segun e anuncio e tempo ey a menciona cu   Barcelo Group lo bira e unico doño di e cadena, unabes cu e deal madura, y cu e keda autorisa pa autoridad di Mexico, un proceso cu por a dura 3 luna. Unabes cu esey tabata cla, e por a obtene e resto di capital y tuma e operacion diario over tambe.

EXPANSION

Occidental, fuera di tin hotel na Aruba, tabatin tambe na Mexico, Republica Dominicana y Costa Rica. Fuera di mencion di Aruba, Barcelo ta menciona cu e kier expande pa Colombia tambe.