Sevinger: Cinco miyon florin pa sanea infrastructura

ORANJESTAD – Relaciona cu e plan di accion cu Gobierno di Aruba ta ehecutando despues di e yobida fuerte di diadomingo cu a pasa, Minister di Infrastructura Sevinger a duna di conoce cu den Conseho di Minister diamars ultimo a tuma decision pa busca un fondo di 5 miyon florin pa atende cu tur e reparacion, pero tambe preparacion cu ta necesario pa e bon ordo y funcionamento di nos pais. E decision a bin despues di a sinta cu instancianan concerni pa haci un evaluacion di camindanan cu a kibra y cu lo haya problema den e proximo dianan pa motibo di e santo cu a keda para. Tambe a tuma nota di e buraconan y tur ta trabou cu lo mester tuma luga entre awo y december. E fondo lo sirbi pa resolve no solamente caminda, pero tambe dam, rooinan y sistemanan di riolering cu mester atende atrobe cu nan, mantene nan,  actualisa y prepara pa si awa sigui yobe. 

Minister di Finanzas ta buscando e fondonan y hunto cu Minister di Infrastructura, lo bay Parlamento pa esaki duna su aprobacion. Minister Sevinger a indica cu esaki ta importante pa alivia e situacion actual di nos careteranan y pa evita cu ta haya mas daño den infrastructura. “Si bo no drecha awo y awa sigui yobe, lo haya mas daño y e ora ey e trabou ta bira mas grandi.”

Mientrastanto, ya caba Minister Sevinger a coordina pa tur servicio di Departamento di Obranan Publico (DOW), Serlimar y Departamento di Agricultura, Cria y Pesca Santa Rosa, cuminsa haci loke por, entre otro, limpiesa di dam, rooi, riool y careteranan. Drone-shot di NoticiaCla.com.