Aeropuerto no ta cla pa tuma post di bombero ‘Oscar’ over ainda

ORANJESTAD – Por lo pronto e post di bombero lo no cay bou di control di Aeropuerto di Aruba. Esaki no obstante cu recientemente gobierno a bolbe los e idea y trece den circulacion. E motibo ta simpel, y ta cu e pensamento di pone e post na aeropuerto conoci como OSCAR cay bou di AAA NV, ainda no ta cla. “Mi no sa nada di esaki” CEO di e compania cu ta maneha aeropuerto, Peter Steinmetz, a declara na NoticiaCla. Steinmetz a confirma si cu tin discusionnan andando entre AAA NV y gobierno riba acuerdonan nobo entre e dos partidonan. Y den e discusionnan aki, e post di bombero ta un di nan, pero te eynan. Pero pa bisa algo concreto, ainda no tin nada.

E combersacionnan de hecho ta trata e aspectonan financiero, compara cu e producto y servicio cu ta wordo brinda na aeropuerto, manera imigracion, toren di control y otro asuntonan cu no ta cay bow di aeropuerto. “E discusion aki ta andando ainda y mi no a tende cu tabatin un decision cu a cay awo”. E ta un proceso unda cu aeropuerto ta bisa cu nan ta dispuesto pa asumi responsabilidad di cierto servicionan (manera bombero) pero e mester keda rasonabel y necesario. “Nos no por paga gobierno pa cierto servicionan y ademas asumi e responsabilidad di mas gasto. E ta bay a costo di nos situacion financiero” Steinmetz ta sigui bisa.

AAA NV tin pensa di haci cierto inversion, pero pa por haci esaki e mester por demostra e compromisonan cu gobierno y kico ta realisabel y kico no. Si esaki ta aceptabel, banconan ta fia placa y sino no. Pues pa aworaki e no ta mustra cu den e futuro cercano, e post di bombero lo cay bou di aeropuerto.

For di gobernacion di un otro signatura (MEP) tabatin e intencion di pone aeropuerto para responsabel pa e post OSCAR, ya cu asina e ta scapa gobierno por lo menos 4 miyon florin pa aña. Placa cu gobierno por uza bon na otro caminda. Ademas ta algo normal cu aeropuertonan rond mundo tin nan ‘propio’ post di bombero. Ora cu e gobierno su signatura a cambia, e minister encarga e tempo ey a mustra cu e ta un pensamento pero cu ‘e momento ey’ e no tabata halto riba e lista di prioridad. Pero awor, cu combersacionnan pa reduci gasto, e topico a bolbe na superficie.