Trahadonan Señor Frog's no tin garantia pa wordo paga

ORANJESTAD - E trahadonan di e establecimento Sr Frog's, no a haya ningun garantia cu nan lo ricibi nan salario di november, december di e aña aki y januari di otro aña. Asina abogado pa e trahadonan Dello Gomez a confirma na NoticiaCla.com. Segun Gomez, e conferencia di prensa di e compania diaranson anochi no a trece mucho claridad. "E relacion di trabou lo sigui existi y si esaki wordo termina, e mester sosode di acuerdo cu leynan aplicabel na Aruba" Gomez a sigui bisa. 

CARTA MANDA

E abogado a confirma cu a manda un carta na nomber di e trahadonan pa e grupo internacional Anderson, y tambe sr (Daniel) Orozco y Jobem NV, informandonan cu tur ta wordo poni responsabel pa e salarionan y pa cualkier daño cu e trahadonan por sufri. E ta considera cu tur esnan menciona, a conspira hunto pa tanto e trahadonan, doño di e local y e supliernan keda perhudica. 

KEN DANIEL OROZCO TA?

For di diaranson ta menciona e nomber di e mexicano Daniel Orozco como e persona responsabel pa tur cos, mirando cu ta el a bin Aruba, drenta e lugar, saca placa y purba bandona nos isla di un forma incorecto. Hopi a yame e doño di Sr Frog's mientras cu otronan ta referi na dje como 'accionista' of tambe representante di e compania. Segun Gomez, su punto di bista y di di departamento di impuesto, ta cu Orozco a haci actonan di directiva (tur e loke el a haci) y den nos sistema legal no por sconde e responsabilidad door di p.e. bisa cu a manda un hende haci e trabou sushi. "E ta parti di e grupo cu ta doño, y e actonan cu el a haci na Aruba, nos ta tene responsabel pe, irespecto su titulo" Gomez a bisa. Den e portal 24ora.com e abogado di Jobem NV cu tabata maneha Sr Frog's na Aruba, esta Joselyn Croes ta sigura cu Orozco no ta e doño, sino representante di e compania. 

CARGONAN CU OROZCO TIN CU PARA PE

Entre e cargonan cu Daniel Orozco tin cu para pe segun Gomez, tin wanprestatie. "E conspiracion cu a tuma lugar, di tur e partidonan ta cualifica como 'onrechtmatige daad' " e abogado a sigui bisa.