KVK kier claridad riba presupuesto 2017

Posted on 11/23/2016, 6:05 PM AST | Updated on 11/23/2016, 6:07 PM AST

ORANJESTAD –  Camara di Comercio (KvK) kier mira claridad riba presupuesto 2017. Asina e gremio a informa pa medio di un comunicado. KvK ta brinda sosten na tur empeño cu por duna vigor na ingresonan pa pais Aruba y cu esaki mester ta efectua na un forma debido den un clima economico saludabel. Segun e gremio, e economia di Aruba den su estado actual no ta duna mucho espacio pa por realisa tur e diferente decisionnan di gobierno pa alivia e pueblo sin cu e sector comercial lo wordo afecta door esaki.

CLARIDAD 

Pa trece claridad y stimula dialogo riba e puntonan aki, Camara di Comercio a dirigi un carta na Conseho Socio Economico (SER) pa por evalua e incentivanan menciona den e presupuesto 2017.

PUNTONAN 

Puntonan cu a ser menciona den e presupuesto 2017 cu sin duda algun tin beneficio pa Aruba ta e.o.:

Hisa pensioen cu 2.3%; Hisa salario minimo cu 2%; Reduci tarifa di coriente cu 15% pa casnan residencial y 5% pa negoshi; Hisa e uitkering normativo pa persona riba bijstand di AWG 407 pa AWG 450 y pa cada miembro di famia cu tin subsidio di AWG 200 cu antes tabata AWG 175; Schookindertoeslag pa cada mucha den un famia di menos recurso lo subi di AWG 200,- pa AWG 250; E suma annual cu cada famia ta ricibi lo subi di AWG 120 pa AWG 220 pa cada mucha; Reduci studielening cu 35%. Esaki tabata 30%; Reduci e suma mensual di Serlimar di AWG 25 pa AWG 10 pa famianan cu tin un entrada bou AWG 2500.

PENSAMENTO DI KVK

Aruba tin actualmente un economia cu ta stagna y un crecemento di 0.4% di GDP no ta representa un crecemento cu ta brinda mucho espacio pa e iniciativanan treci den e presupuesto 2017.

Durante 2016 tin menos compania cu a registra den e registro di KvK. Te cu october 2016 tin un total di 1036 compania nobo registra compara cu 1134 over e mesun periodo di 2015. Mester bisa si cu pa 2016 tin menos companianan cu a wordo retira di e registro di KvK. Esaki no ta kita afor cu lo por tin varios cu no a haci esaki ainda.

Nos pilar industrial dominante, cual ta turismo, no a mira crecemento considerabel. E situacion di Venezuela ta causante di un bashi significante pa loke ta e resultadonan di turismo ora nos wak e cantidad di bishitante, cuanto anochi nan ta keda y nan consumo. Venezuela na 2015 a representa 25% y na 2016 un 20% di e totalidad di nos bishitantenan. Nos tin over e periodo di januari te cu februari di 2015 compara cu mesun periodo pa 2016 un caida di 37.339 bishitante.

Ademas CBA ta indica cu e confiansa di e consumidor a baha pa e tercer trimester di 2016 cual gran parti ta debi na e incertidumbre den e crecemento economico. E di dos trimester di 2016 e indice di confiansa di e consumidor tabata na 96.8 y esaki a baha na 96 pa e tercer trimester. Cu un poder di compra relativamente debil, esaki ta pone den duda si ta principalmente comercio tin cu bai carga cu e fondonan pa haci e presupuesto 2017 factibel considerando e gastonan y entrada existente di sector publico.

PUNTO DI BISTA DI SER

KvK lo kier mira e punto di bista di SER riba e presupuesto 2017 y haya sa si SER tin confiansa den e puntonan menciona den e presupuesto y cu e vision di gobierno ta uno factibel y cu e lo no bin cu efecto negativo riba comercio y economia di Aruba.