A baha representante di doño di Señor Frog's for di avion

ORANJESTAD - Net prome cu e sali pa exterior, autoridad policial y imigracion a pone man riba un di e representantenan di Señor Frog's (Daniel O.)  diaranson merdia. E tabata den avion cla pa bandona Aruba, ora cu lo a ordena e capitan di e avion pa bolbe na gate pa baha e pasahero en cuestion. Daniel O. A compronde cu pa motibo di posibel debe pendiente y otro casonan cu mester wordo investiga, el a haya un prohibicion pa bandona nos isla. Na aeropuerto polis a interoga y splica O. e motibonan pa cual el a wordo baha for di avion, y cu e mester a acudi na belasting kantoor pa regla cosnan pendiente. NoticiaCla.com a confirma cu enberdad O. a presenta despues cu abogado di e compania, (Joselyn Croes) na oficina di belasting pa atende un ke otro. Trahadonan desampara algun rato prome a acudi na aeropeurto ora cu nan a tende cu O. tabata na caminda pa aeropeurto pa bandona Aruba. Un anochi prome, el a acudi na e establecimento nocturno, saca tur hende afo, coi e placa di caha, y bandona e lugar bek. 

TRAHADONAN A PROTESTA

Tabata NoticiaCla.com cu den forma di primicia a raporta cu un total di 30 trahado a keda sin trabou di un dia pa otro, ora cu propietarionan di e restaurant/club Sr Frogs, a cera e porta repentinamente riba nan diamars anochi. Desespera y  en busca di ayudo, e grupo a bay bestuurskantoor pa wak kico  gobierno por haci pa nan. E marketing y sales manager di e compania Starr Ramos a splica NoticiaCla.com cu awor tin un cantidad di trahado, un luna prome cu pasco cu ta sin trabou. Mes momento Ramos ta splica cu e compania no tabata bayendo bon pero cu ta siman pasa nan a cuminsa nota cosnan straño na e compania. 

SITUACION MALO

Ramos ta admiti cu cosnan no tabata bayendo bon ultimo añanan, pero siman pasa algo a pasa cu a shock nan, y pone nan cuminsa cana caminda pa abogado. Aki a pidi e abogado pa comunica cu e abogado di e compania pa nan haya claridad. E claridad ey (no obstante cu a manda carta) nunca nan no a haya segun Ramos. "Nos tabata kier un contesta legal pasobra nos tin miedo cu e compania ta bay cera, pasobra nos ta 30 hende, un luna prome cu pasco y nos kier sa kico ta pasando". Diaranson anochi laat un di e accionistanan di e compania -Ramos ta sigui conta-, a drenta den e lugar, bisa cu tur hende (incluyendo e bishitantenan) mester a sali, mester a entrega e yabi, y nan a clear out e 'vault' cu tur e placa y nan a bisa cu desde diaranson (awe), Sr Frogs na Aruba no tey mas. "Y nan a bisa cu tur hende por haci loke nan kier pasobra e compania no ta existi mas" Ramos a sigui bisa. Tin un abogado (Dello Gomez), cu a bolbe manda un carta pa e abogado di Sr Frogs (Allan Kuster) sin contesta. "Awor nos tey purba papia cu minister pa yuda nos cu nos derechonan y con nos tin cu sali dilanti cu e caso aki. No por ta asina cu un hende di Mexico ta drenta den nos lugar unda cu nos a traha hopi aña, -tin cu a traha mas di 18 aña-, y awor nos ta sin trabou".  A splica e portal cu tabatin contacto cu minister Paul Croes y cu lo cuminsa wak kico por haci. Despues di e bishita na Bestuurskantoor, lo mobilisa pa Dept di Labor. 

E LUGAR TA HABRI Y BASHI

Mientras cu ayera e doñonan a cera e lugar, cambia e candal, awe mainta portanan a lanta hanchi habri, pero notablemente bashi (check e potretnan), unda cu a strip e lugar di tur cos cu tabatin balor. E trahadonan a sali mesora pa evita cu ta culpa nan di algo y yama polis pa nan. E intencion tabata pa yama tur hende bin sr Frogs pa splica kico a pasa. Pero mirando e situacion cu nan a haya e lugar aden, nan a spanta y a opta pa bin Bestuurskantoor.