Gobierno ta perde caso contra Lee Tofanelli den apelacion

ORANJESTAD - Gobierno di Aruba mester cumpli cu e acuerdo cera cu e promotor Lee Tofanelli, y como tal ta destrui e sentencia den prome instancia. Asina Hof a dicta diamars den un sentencia. Tofanelli a hiba gobierno corte ora cu el a para e contracto pa continua organisa e Aruba Music Festival, manera tabata e caso e añanan anterior. Gobierno (minister di turismo Otmar Oduber e tempo ey) a para e contracto ora cu nan a bin na mando na 2009, argumentando e.o. cu e minister anterior di turismo viola e ley di comptabilidad y cu mester cancela e contracto aki. Tofanelli a hiba gobierno corte y a perde den prome instancia. Den e apelacion, Tofanelli sinembargo ta gana y awor gobierno mester cumpli cu pago di daño y perhuicio. 

CONTRACTO

Manera ta conoci, Lee Tofanelli a cera contracto cu gobierno di Aruba na 2002 pa organisa conciertonan pa e proximo añanan, pa cual el a haya un presupuesto pa continua cu esaki tur aña. Dado momento ATA (Aruba Tourism Authority) cu ken Tofanelli tabatin e relacion cune, a opta pa reduci e presupuesto mirando cu e festival no tabata 'rindi'. A sigui no obstante esey, y na 2008 -tin disputa cu a firma net prome cu eleccion na 2009- a extende e contracto pa organisa festival tambe den 2010 te 2013. Pero ora cu gobierno a cambia, e mandatario di turno -Otmar Oduber- a para esaki. Tofanelli a hiba gobierno corte cu e resultado conoci. 

SENTENCIA

Hof den e caso aki ta refuta e.o. e ponencia di ATA cu tabatin motibo di urgencia pa reduci e presupuesto. Ademas, e hecho cu Tofanelli no tabata presenta cifrananan na tempo of manera cu ATA tabata pidi, a wordo bon argumenta pa Tofanelli. E hecho cu e contracto lo ta violando orden publico y como tal ta illegal, tambe a keda refuta pa Hof. Ademas tambe, ningun momento segun Hof, a viola e ley di comptabilidad, cu tabata e base pa gobierno e tempo ey, para e contracto cu Tofanelli. Cu e sentencia aki, Hof ta duna Tofanelli e caso gana y pa cual gobierno mester paga Tofanelli daño y perhuicio (suma no ta menciona pero e contract tabata entre 500 pa 850 mil dollar pa 4 aña), y tambe mester paga e gastonan di e caso. 

REACCION OTMAR ODUBER

NoticiaCla a pidi e ex mandatario pa e su comentario, riba e caso aki pero como cu e no tabata sa di e sentencia, e no por a comenta mucho ariba tampoco. El a informa e portal aki cu el a tende di dje, pero no (tabata) sa e detayesnan ainda. Lesa e sentencia aki.