Otmar Oduber a oficialmente anuncia partido nobo

ORANJESTAD - Aunke no a anuncia nomber, color ni nomber di partido, pero si uzando palabranan manera 'plataforma nobo politico', 'forsa nobo', ex minister Otmar Oduber diamars a anuncia oficialmente cu e ta lansa su partido nobo. Asina e ta  confirma e primicia di NoticiaCla.com. Repasando su carera, y loke falta den politica, Oduber a mustra cu e intencion ta pa crea un oportunidad di igualdad pa tur hende cu no ta hayando un voz, y duna nan esaki awor. 

KEN TA RIBA LISTA? COLOR?

Mes momento riba pregunta di NoticiaCla.com, Oduber no tabata cla pa anuncia e nomber di e partido, ni ken tur ta riba e lista. "No, pasobra mi ta kere cu tin cu duna respet na esnan cu bo ta combersando cu nan" Oduber a bisa refiriendo na e nombernan di esnan cu ta riba e lista. Lo haci e anuncio mitar di december proximo mas sigur segun e politico di 44 aña. "Mi kier sigura comunidad di Aruba cu nan tin Otmar Oduber como politico pa hopi aña mas y pa sirbi e comunidad di Aruba na e mihor forma cu e por". Pues tin cu warda un poco mas largo, aunke cu a compronde den 'gangnan', cu e color cu ta 'aspira' ta esun blauw. Si esaki bira un hecho, tin cu wak ainda. 

E ANUNCIO

Tabata dialuna cu NoticiaCla.com den forma di primicia a revela cu Oduber lo anuncia su futuro politico nobo, y cu a dicidi cu e ta bin cu un partido nobo. Mas cu esey fuentenan cerca di e proceso no tabata dispuesto pa confirma na NoticiaCla.com. E intencion ta pa diamars durante un conferencia na su cas, e informa comunidad cu el a dicidi cu e ta forma un partido politico nobo cu cual e tin pensa di participa den e proximo eleccion parlamentario na september 2017. For di su salida di partido AVP algun siman pasa, el a duna suficiente indicacion cu esaki lo ta su proximo paso. Diahuebs siman pasa e portal aki a informa den forma di primicia caba a anuncia cu Oduber tabata cla pa tuma e siguiente paso y cu e fin di siman ey e lo a delibera cu su famianan y despues participa e noticia publicamente.