ATIA: Preocupa cu aumento di gasto imponi pa gobierno

ORANJESTAD - ATIA ta preocupa cu aumento di gasto imponi pa gobierno. Den un comunicado emiti pa e gremio comercial, ATIA ta splica cu nan a tuma nota cu gobierno a anuncia algun decision cu lo bay na vigor januari di 2017. Gobierno den pasado tawata informa comercio di su decisionnan, pero parce cu esey ta pertenece na pasado. 

COMERCIO LUCHANDO 

Comercio cu ta luchando den un economia cu actualmente no ta creciendo y cu un gran cantidad di negoshi chikito y mediano luchando, sin mas ta dicidi aumenta e gasto di salario cu 2%. E salario no ta aumenta solamente pa esnan cu e salario stipula pa gobierno, pero automaticamente pa esnan cu ta ariba esaki tambe cu consecuencia cu comercio ta wordo confronta cu un aumento di gasto imponi den un tempo y aña cu por ser catogorisa sigur como dificil. 

NO TIN DIALOGO MAS

ATIA semper ta dispuesto pa duna su punto di bista y dialoga pa yega na compromisonan na beneficio di nos economia y nos clima di inversion. Lamentablemente tal dialogo no ta tuma luga mas y gobierno ta impone ariba comercio gasto sin tene consideracion cu e efecto cu esaki por tin ariba empleo y inflacion y ta significa un aumento di gasto ariba negoshinan. 

REDUCCION DESPROPORCIONAL DI UTILIDAD

ATIA tambe a tuma nota cu e prijs di awa y corriente lo bay baha na un forma desproporcional pa negoshinan na Aruba. Atrobe comercio ta ricibi un reduccion chikito di locual lo ser compensa? Cu e acto aki ta parce cu gobierno ta duda den e mecanismo di control di prijs na Aruba y e efecto cu un mercado liber competitivo tin. Na parecer di ATIA dunando comercio un parti igual na locual ta duna e consumidor priva lo tin un efecto multipel y hopi mas grandi ariba inversion, inflacion, empleo y sobreviviencia di negoshi na Aruba. Ademas, lo manda un señal cu negoshinan por tin confiansa den e temporada nos dilanti. Gobierno ta manda un señal net al contrario door di unilateralmente dicidi gasto y maneho economico pa comercio. 

CREA VISION DI CONFIANSA

ATIA ta preocupa cu e tendencia aki y ta urgi gobierno pa tene bon cuenta cu nos mester crea un vision cu ta duna confiansa. E señal ricibi cu e decisionan aki tin e efecto contrario y ta confundi comercio na Aruba.