Gobierno : Recomendacionnan CFT no mag causa tension economico indesea

ORANJESTAD – Gobierno ta receptivo pa cualkier recomendacion cu e secretariado di College Financieel Toezicht bin cune aki tres siman. Segun minister di finanza Angel Bermudez na NoticiaCla.com, e ta dispuesto pa ricibi cualkier recomendacion di CFT contal cu nan ta realisabel y cu nan no ta crea tension indeseabel den economia di Aruba. E lo considera tur e recomendacionnan abiertamente, pero den discusion cu expertonan financiero pa wak si ‘e ta tuma nan’.

Mes momento Bermudez ta confia cu e recomendacionnan haci lo ta realistico. Tambe e kier pa gobierno por tin e libertad pa y prerogativo pa dicidi finalmente si nan ta tume, ‘pasobra na fin di dia ta gobierno ta carga e responsabilidad di e pais aki” Bermudez a bisa. Bermudez ta referi cu no por impone condicion sin cu gobierno tin e chens pa dicidi esaki.

Segun e mandatario, e loke cu CFT ta haciendo ta investigando si e condicionnan pone door di gobierno pa por logra un presupuesto balansa, ta suficientemente solido. “Y si no ta asina, ta spera cu nan lo bin cu recomendacionnan con pa si solidifica e condicionnan aki pa logra nos presupuesto balansa” Bermudez a sigui bisa.

CFT ta den su di dos siman di investigacion di e presupuesto 2014 y ta programa pa entrega e resultado medio september awor. E expectativa ta cu CFT lo bin cu un cantidad di remarke y sigur recomendacionnan cu gobierno di Aruba mester aplica pa por haci e presupuesto uno mas ‘realistico’. Esaki siendo cu premier Mike Eman a bisa caba cu su gobierno a haci tur loke ta na nan alcanse pa e presupuesto ta uno realistico. Gobernador y gobierno di Reino Hulandes tabatin otro pensamento y a laga e secretariado di CFT haci e investigacion. Un investigacion cu a keda tranca pa varios siman pasobra gobierno no kier a coopera. Dos siman pasa gobierno a dicidi di cambia nan actitud y coopera pa evita mas problema cu Hulanda.