Kiwanis Key Club Colegio Arubano a celebra 40 aniversario sirbiendo comunidad di Aruba

ORANJESTAD – Recientemente, Kiwanis Key Club Colegio Arubano a celebra su di 40 aniversario den grandi.  Durante un anochi ameno e  “Key Clubbers" actual,  ex- “Key Clubber"  y tur e personanan cu a sostene Key Club Colegio Arubano desde cu e la keda funda na 1976, a bin hunto pa conmemora y celebra e fecha importante aki. Tabata un momento hopi agradabel di por a topa cu otro despues di varios aña. A probecha di e ocasion pa intercambia storia y momento agradabel,  pa comparti tempo cu nan tabata studiante na Colegio Arubano.

Durante e ceremonia oficial a recorda e fundador di Kiwanis Key Club Colegio Arubano den feliz memoria “Fellow Kiwanian” Oscar Antonette, kenda tabata “Charter member” di Kiwanis Club of Aruba, president y Lt. Governor.  Su deseo semper tabata pa duna e hubentud un oportunidad pa siña tocante e importancia di cuida, yuda y duna bek na comunidad. Kiwanis Key Club Colegio Arubano  a wordo funda dia 5 di november di aña 1976 y a bira e prome club di servicio specialmente pa hubentud y dirigi pa e hubentud. 

Kiwanis Key Club Colegio Arubano a wordo funda na 1976 cu hopi esfuesrso y dedicashon di Sr Oscar Antonette y Sr. Herman Steenhuizen y a cuminsa cu 20 “charter members”. Remarcabel ta, cu e prome president di Kiwanis Key Club Colegio Arubano e tempo ey, tabata un ser feminino; sra. Elvira Orman. 

E “charter members” presente:  sr. Gerardo Figaroa,  sra. Claudine Ho Kang You, sr. Edwin Abath, sra. Melva Wong, sr. Feliz Kelly a ricibi reconocimento durante e anochi aki. Despues cu e presidentenan y LT governor a wordo menciona, e Vice- Presidente di Kiwanis Club of Aruba a gradici tur e actual “Key Clubbers” y e ex “Key Clubbers” pa nan contribucion durante nan añanan.  

A reconose tambe e “Faculty advisors” y ”Kiwanis Advisors” cu a duna hopi di nan tempo liber: sr. Francisco Celaire, sra. Annie Sneek, sra. Anuesca Baly, sr. Hubert Goedgedrag, sra. Marushka Tromp, sra.Sonaima Jonis, sr. Everick Rincones y sra. Thäis Nava. 

Sr.  Celaire a menciona den su “speech” cu e la goza traha cu e juventud y con importante Key Club tabata pa su bida. E la ripara cu diferente  ex “Key Clubbers” a bira lider den comunidad of den exterior cu un futuro brillante. 

Banda di un anochi placentero, e personanan tambe a por a bisita un “exihibition” unda por a wak diferente potret den e transcuro di e 40 aña di e club manera entre otro ‘scrap book’, “awards” y informacion di Key Club actual. E decoracion tabata impresionante traha di productonan recycla.  

Kiwanis Club of Aruba Y Kiwanis Key Club Colegio Arubano kier a gradici tur esnan  cu a haci e evento aki posibel. Masha danki pa nan excelente cooperacion y dedicación. 

Kiwanis ta un organisacion global di boluntario dedica na mehora mundo via un mucha y via di un comunidad cada biaha y tin como lema: sirbiendo e muchanan di mundo. Kiwanis Club of Aruba ta activo den e comunidad Arubano desde 1965. Pa mas informacion di Kiwanis Club of Aruba y of su actividadnan por acudi na www.kiwansaruba.org of Facebook page Kiwanis Club of Aruba.  Tambe por bishita e website di Kiwanis Internacional na www.kiwanis.org.