Premier Mike Eman a coordina operacion riba awacero torrencial

ORANJESTAD – Premier Mike Eman a coordina operacion riba awacero torencial. Poco pasa di 1’or di merdia y despues di a subi caya pa conoce personalmente e situacion. Eman a duna un conferencia di prensa pa informa comunidad completo di esfuersonan haci, kico pa spera y con pa contribui. 

E anuncio a wordo haci for di cede di Rampenbureau na Wayaca caminda e lider di e pais a reuni cu instancianan concerni manera Cuerpo Policial, Cuerpo di Bombero, Servicio Meteorologico, DOW, Departamento di Salud Publico, Departamento di Asuntonan Social y companianan di utilidad, entre otro. 

Eman a trankilisa ciudadanonan sigurando cu tur entidadnan publico ta riba caya dunando asistencia na tur cu tin mester. Tambe a menciona cu ta sigui monitorea e desaroyonan di tempo y cu ta spera cu pa dialuna tur cos lo ta bek na normalidad.

Eman a confirma cu diadomingo marduga a cay un cantidad remarcabelmente halto di yobida; casi 70 mm di awa. Pa duna un idea, esey ta practicamente dobbel di loke a cay tempo cu horcan Matthew a pasa. Como tal, Eman adverti riba e peliger cu Rooi y Damnan a bira den diferente districto.

E asistencianan di mas urgente, segun e mandatario, tabata na Palm Beach, Tanki Leendert, Paradera un persona afecta pa lamper na Coba Lodo. Madiki, Sabana Liber y Seroe Patrishi tambe a atende cu ciudadanonan den situacion fastioso pa motibo di awa. Den coordinacion cu Cruz Cora a instrui pa habri un shelter ubica na Club Don Bosco na Noord pa ricibi personanan cu no por keda na nan propio cas. 

Eman a confesa di su mes a wordo sorprendi pa e mal tempo mientras cu pa diadomingo mainta tabata preparando pa yegada di Sinterklaas y celebra e tradicion aki cu muchanan di Aruba. E actividad a keda pospone pa mas den e siman nos dilanti. Premier Eman a sigura cu scolnan lo ta habri dialuna.

Durante resto di e dia, e mandatario a sigui coordina esfuersonan publico y priva riba den diferente punto di nos comunidad. Hunto cu Minister Benny Sevinger a pasa den diferente bario pa duna un man unda cu tabata necesario y personalmente duna oido na e personanan cu a keda perhudica pa naturalesa.