Garage Cordia y Sonrisa cu celebracion special

ORANJESTAD - Garage Cordia, Toyota y Lexus ta uni cu Sonrisa pa un celebracion grandi di 6’or di atardi pa 9’or di anochi riba diasabra 3 di december. Tur hende, di e mas chikito pa e mas grandi, ta invita pa celebra Dia di Personanan cu un Limitacion cu bishita di Sinterklaas, gaita, gruponan di baile, un ‘photo booth’, cuminda, un bar bon surti y benta di articulonan pa temporada di fin di aña.

Gerente di Benta y Mercadeo di Garage Cordia, Vanessa Hollander, a anuncia durante di un conferencia di prensa hunto cu Annelies Schoop y Angelique Perez-Kelly di Fundacion Sonrisa, cu como representante di Toyota y Lexus, hunto cu BYD ta e anfitrionnan orguyoso di e evento aki.

Durante di e atardi aki Toyota y Lexus lo tin tur su modelonan den showroom y lo tin ofertanan super special riba diferente modelo. Garage Cordia, hunto cu Sonrisa a invita tambe otro organisacionnan pa ta presente pa bende nan regalonan y decoracionnan di Pasco pa recauda fondo. Miembronan di Sonrisa lo ta bendiendo nan ultimo rifanan pa e sorteo cu ta tuma luga na final di e anochi. E ticketnan pa e rifa pa e premio spectacular, un bunita auto nobo BYD, ta costa solamente 5 florin.

Bishita Garage Cordia, cumpra un ticket di Sonrisa y disfruta di un ambiente sumamente ameno, y mustra bo sosten, laga personanan cu un limitacion sa cu nan ta parti di e comunidad.