Avion di sosten presidencial Mericano brevemento na Corsou

WILLEMSTAD - Un di e avionnan di e flota di avion presidencial Mericano, e Boeing E-4 Advanced Airborne Command Post a aterisa diabierna anochi na Corsou hunto cu un otro di e flota. Contrario na pensamento eroneo, esaki no ta e avion den cual presidente Mericano Barack Obama ta bula (Air Force one). De hecho, cualkier avion cu Obama ta aden, ta haya e identificacion "Air Force One". Debi na e parecido di e avion cu Obama ta aden, e rumor a core liher cu Obama lo aterisa na Corsou di transito pa su biahe pa Peru. Pero 'lamentablemente' tabata un avion di sosten solamente. E otro avion a bandona Corsou despues di algun ora, mientras cu esun di sosten di comunicacion a pasa anochi na Hato. Obama ta den su ultimo gira internacional, y ta clausura esaki cu un bisita na e cumbre di APEC na e pais andino. Esey no a haci e noticia menos interesante. Hopi hende a acudi na aeropuerto pa mira e avion toch. Den pasado ora cu tabatin un cumbre na Colombia, e avion presidencial a pasa anochi na Corsou, como medida di seguridad, y despues a bay busca e presidente na Colombia ora cu e bishita a termina. Foto cortesia Bea Moedt.