Ta prohibi pa bula 'Drones' riba tereno di APA

ORANJESTAD - Aruba Ports Authority hunto cu e comision Sinterklaas ta participa na henter nos comunidad cu diadomingo awor 20 di November Sinterklaas ta yega Aruba. E boto cu ta trece Sinterklaas ta ser spera na waf di Oranjestad pa 9:30 mainta. E porta di waf cu lo ser habri pa publico ta e porta parti pabao cerca di e Toren di APA. E porta aki lo habri pa 9 or di mainta pa duna asina oportunidad pa mayornan cu nan yiunan por pasa paden promer cu e boto yega y haya un bon lugar di para. Lo tin baricada y cuerpo di seguridad pa indica unda por cana y tambe te na unda por para, ta pidi tur hende pa respeta pues e baricadanan y nos miembronan di seguridad cu lo tey pa guia publico. Gerencia di APA tambe ta desea di participa cu lo no permiti pa bula “Drones” riba e tereno di APA, esaki mester conta como un advertencia pa tur esnan cu tin e aparatonan aki pa nan sa di antemano y pa no purba bula e aparatonan aki riba tereno di APA, lo tin vigilancia extra di seguridad pa controla esaki. APA ta spera nos comunidad manera semper duna Sinterklaas un caluroso bonbini y ban haci su estadia na Aruba uno memorabel y cu tur hende lo sa di comporta lo mihor posibel pa no tin nodo di bay den saco pa Spaña.