Otmar ta anuncia diamars si ta lanta partido politico of no

ORANJESTAD - Diamars awor ex minister Otmar Oduber ta anuncia su desicion riba su futuro politico. E ex mandatario a confirma pa NoticiaCla.com cu elo anuncia su desicion 'definitivo' pa futuro. Esey ta nifica cu e ta participa si e ta lanta su propio partido politico of den ki otro forma e ta sigui aporta den politica. Y for di fuentenan cerca di e proceso, a compronde cu tin hendenan di e partido berde cu tambe ta uniendo cu ne. 

REUNION CU FAMIA

Segun Oduber, e puntonan di evaluacion principal ta su famia completo. "E weekend aki lo dicidi den seno familiar despues di a consulta un gran cantidad di persona" Oduber a confia na e portal aki. Mas e no kier a bisa, sino a mas bien bisa pa keda pendiente pa diamars awor. Cu e desicion ey, ta bin un punto na e incertidumbre grandi cu t'ey eyfo, cu por cambia e panorama electoral sigur pa otro aña cu ta aña di eleccion. 

INTENTO PA REINGRESO?

Los di esaki, e portal aki a compronde di fuentenan cerca di partido cu tin hopi asercamiento pa cu Oduber, unda cu tin hasta hende den top di AVP cu lo a haci basta intento pa trece e ex minister bek den dialogo cu partido berde. Oduber mes no kier a duna comentario riba e parti aki. Otro intento pa haya reaccion di e partido no tabata exitoso 'ainda'. 

FUTURO DI ODUBER

Pa hopi, e desicion ta tuma caba y cu ta meramente formalidad Oduber ta haciendo door di crea un momentum rond di e situacion aki. Sigur si tende su analisa su palabranan durante e conferencia di prensa unda cu ela anuncia su despedida como minister y for di partido. El a bisa cu e no ta bay cu ningun otro partido, y tambe cu e no ta cla pa laga politica. Loke tambe ela duna hint, ta cu e lo kier bin cu algo nobo, un cambio di mentalidad pa hiba politico. Algo cu a tende otronan bisa tambe den pasado, pero cu no a logra debi na e ambiente y cultura politico anticua cu ainda ta basta fuerte inculca den te hasta politiconan hoben. Tin comentario cu ta bisa cu for di januari caba Oduber ta cana cu e idea di un partido nobo, pero cu esey a baha poco ora cu el a dicidi di keda den partido AVP na comienso di aña. Pero una bes cu tabatin crisis atrobe, e pensamento di partido nobo a bin ariba y nunca mas no a bay. E pensamento comun ta cu no ta cuestion di si Oduber ta bin cu partido, sino ki dia, y den ki forma. Pero porta mas interesante ainda, cu ken e lo forma esaki y si e ta contene miembronan di partido berde. Algun nombernan di personanan cu a traha hopi cerca cu Oduber den e industria turistico ta wordo menciona, y tambe personanan cu ta labora na aeropuerto, cu lo ta cla pa uni cu Oduber riba su lista.