Homenahe Doble R na WTC lo brinda experiencia di CNSJ gratis

WILLEMSTAD – Pa esnan cu nunca no a experencia un anochi di Curacao North Sea Jazz Festival, e anochi di homenahe na Doble R e diahuebs dia 28 di augustus ta e anochi pa bishita. Den un entrevista exclusivo pa Aruba cu NoticiaCla.com , e creador di e festival Gregory Elias ta bisa cu esey ta un di e motibonan pa mobilisa e concierto gratis aki pa World Trade Center na Piscadera. E otro motibo pa tene e evento na WTC, ta pasobra eynan tin e unico stage cu por wanta e orchestra hulandes Metropole di mas di 70 hende sin problema.

Elias ta mustra cu e kier a mantene e anochi su tradicion di ta pornada, y esey esnan cu a para 2 pa 3 ora den fila pa haya nan carchi gratis ta bay haya tambe. Solamente nan tin cu move e biaha aki pa WTC. Y e experiencia di un anochi ‘normal’ di e festival, lo wordo experencia pa e bishitante cu ta bin pa Doble R. “For di e busnan cu ta core pornada di bo auto pa e centro, e barnan cu lo ta habri, e diferente escenarionan” Elias ta bisa.

E meta principal ta pa e publico aki sinti y experencia kico Curacao North Sea Jazz ta. “Mi kier pa tur amante di Doble R mira kico ta come y biba riba tereno di WTC. Kico kier men CNSJ, cu a buta cu e evento a tuma un paso asina grandi cu hende te na Australia, Alemania y paisnan mas lew ta papia di dje awor. Importante detaye segun Elias ta cu tin cu tene cuenta cu tin hendenan di mas edad (corda cu Doble R tin mas di 45 di existencia) cu ta fanatico di semper di Doble, y cu nan lo no por para largo. “Pa e grupo aki, nos a prepara e Celia Stage den airco unda cu nan por sinta, y mira e concierto riba pantayanan grandi. Asina tambe nan ta mira e otro stagenan cu tin durante e festival di CNSJ.