WEB : A ofrece deal miho posibel y ta spera trahadonan recapacita

ORANJESTAD - "Gerencia di WEB ta garantisa e suministro di coriente di awa y electricidad na comunidad di Aruba". Esey tabata e prome mensahe di director di WEB, Luis Oduber diahuebs anochi durante un conferencia di prensa di ultimo. Despues cu sindicato di trahadonan di WEB  (SIWA) a bay den prensa pa relata riba e situacion di e CAO y e welga, gerencia tambe a hay'e ta bin afo awe pa duna nan version di e situacion cu ta surgiendo den e impasse laboral. E situacion laboral mes ta uno mas complica, y Oduber a sigura cu WEB a yega na un pakete 'hopi bon', pero mes momento e ta un pakete cu ta e limite cu e compania por yega. Mas cu esey nan no por a bay, y ta spera cu e trahadonan den accion recapacita. 

A RECHACHA UN BON DEAL

Segun Oduber, e deal riba mesa awor ta uno miho cu e trahadonan tin, pero cu lamentablemente e trahadonan no a acepta. "Mi ta pidi e coleganan pa nan reconsidera, wak e pakete bon. E ta un bon pakete" Oduber a sigui bisa. Ta papia di un aumento salarial di 195 florin pa luna na 2017 y 2018 similar. Tin sign up bonus y un otro bonus pa e proximo añanan, tur mara den un contracto colectivo di 2 aña. Algun condicion secundario tambe a keda adapta, pero no por bay fuera di loke por financieramente. "E no ta porta un adaptacion cu e miembronan ta desea, pero nos a purba. Loke nos a ofrece awor ta e maximum cu nos por" Oduber a reitera. "Nos no ta papiando nada di kita y pone y e trahadonan sigur lo no bay atras" e director a sigura. A mustra cu no a haya un contra oferta, y lo tin cu scucha awe nochi kico ta loke e trahadonan kier. 

KICO E PROBLEMA LABORAL TA

Segun Oduber, e trahadonan ta bringando pa un suma cu nan ta compara loke e IAOers (e staff) ta ganando. Na 2013 WEB a introduci un structura compara cu den pasado unda cu no tabatin plafond (pa aumento). Tur funcion awpr tin plafond, y ta defini kico por yega y unda por yega cu aumento. Esey ta nifica tambe cu no ta haya aumento sin mas, y tin structura di salario di sindicato (CAO'rs) y como tal tin e mesun schalering pa nan. A splica cu pa sindicato ta usa letternan  A te cu H pa aumento, mientras cu staff ta di 1 te cu 9 (schaal), mientras cu e ultimo 3 schaalnan ta manager, hoofd y chef cu tin responsabilidad mas halto. Loke kier a logra ta un aumento structural basa riba prestacion, pues no un aumento sin mas, automaticamente, sino riba prestacion. Si e persona cumpli cu trabou, ta haya e aumento y average. Pero ta discusionan cu dentro di poco tin cu bay atende cune pa incorpora. Consumo di coriente no tabatin aumento, cu ta nifica cu e placa tampoco no a drenta manera cu mester tabata. "WEB ta bende dos producto. Awa y coriente, pues tur e entrada ta depende di esey. Si gasto sigui subi, tin cu atende cu esaki den e tarifa. Tin como meta pa purba reduci e tarifa pasobra WEB no ta un compania pa genera ganashi. Esey ta e situacion financiero y operacional cu tin pa loke ta e situacion laboral. Tabatin un reunion programa pa 8'or diahuebs anochi cu mediado di gobierno. 

SITUACION OPERACIONAL

Manera cu Oduber a bisa, a garantisa suministro di coriente y awa, pa cual a yama tur staff aden, y a parti nan conforme un plan cu tin. Y a tuma e operacion di e planta over. "E operacion di e planta ta bayendo bon. Te awor no tin ningun complicacion. Planta ta coriendo bon. Nos por garantisa te aworaki e suministro di awa y coriente" Oduber a bisa. E reduccion di presion di awa na Rooi Koochi tabata un problema incidental y no relaciona cu e welga. Esey a keda drecha tambe. E biento tabata abou, y berdad e parke di molina na Vader Piet no a produci nada. Esey por tabata un problema pa WEB y por a genera un asina yama 'swing' cu por causa problema, segun e trahadonan. Sinembargo, segun Oduber, si Vader Piet cuminsa produci (coriente), ta cuminsa baha e cantidad internamente cu ta pone cu no tin problema y ta algo (contrario na pensamento di e trahadonan) cu e staff por handle sin problema.