Varios instancia hudicial a firma pa crea 'Fusion Center'

ORANJESTAD - Diaranson a tuma lugar firmamento di un acuerdo (convenant) entre varios instancia hudicial pa asina crea  e asina yama 'Fusion Center'. Ta un intento pa uni forsa entre e departamentonan pa un miho cooperacion cu mester logra mehora combatimento di crimen den nos pais. Segun minister di hustica Arthur Dowers, a determina hopi aña pasa cu mester comparti informacion den un forma mucho mas eficiente cu e manera cu e ta wordo haci na e momento aki. Un di e problemanan cu no por a logra esaki tabata e parti financiero, y tin hopi mas reto pa tene cuenta cu ne. Tur esaki ta crea e oportunidad pa por crea e Fusion Center, bou responsabilidad di ministerio di husticia. 

MINISTERIO PUBLICO 

Segun fiscal mayor Erik Olthof, a mustra cu e Fusion Center ta un bon cos pasobra a determina cu por tuma desicionan bon den mundo hudicial solamente si bo posicion di informacion ta den orden. "Si esaki no ta den orden y bo falta pida informacion, pa definicion e ta casi e desicion robes cu bo ta tuma y e escohencia robes pasobra bo no (taba)tin tur e informacion necesario" Olthof a bisa. Mientras cu e ta mustra cu den pasado tabata traha hunto caba, pero awor e ta bira mas structural cu e hendenan crucial hunto riba e manera cu ta stipula segun Fusion Center, e ta fortifica e tipo di informacion cu lo beneficia e grupo di maneho na Aruba. "E ta nifica e balor mayor den combatimento di criminalidad y finalmente e engrandecemento y optimalisacion di seguridad na Aruba" fiscal mayor Olthof a sigui bisa.