Conferencia riba crimen cybernetico ta intercambia di informacion

ORANJESTAD - E conferencia riba crimen cybernetico a inicia diaranson na Aruba, bou di maneho di e.o. fiscal Marten van Nes di St Maarten. Segun van Nes, ministerio publico a apunt'e pa yuda y lidera combatimento crimen cybernetico na St Maarten. Pa loke ta e conferencia, van Nes a splica cu e intencion tabata pa durante e conferencia, intercambia informacion riba e tema di crimen cybernetico. "E ta un problema creciente den region di Caribe. Un otro meta (di e conferencia) ta pa personanan cu ta envolucra cu e tipo di maneho di crimen aki, siña conoce otro, tanto gobierno como den sector priva" van Nes a bisa. Hunto cu fiscal, tin tambe funcionarionan di Recherche  Samenwerkings Team (RST) cu tambe tin experticio riba e tereno aki. 

ERIC BOERBAN (RST)

Segun experto riba e tereno pa RST na Corsou, Eric Boerban, nan ta conduci hopi investigacion riba e tema aki, hunto cu ministerio publico. E ta splica cu hunto cu OM, RST por a organisa e evento aki na Aruba. Y manera cu van Nes a splica caba, ta(bata) e intencion pa busca un tipo di coneccion tanto publico como priva riba e tema. Aki e instalacion di perscusion digital ta hopi important segun Boerban. E maneho di criminalidad digital ta hopi grandi, y ta hopi vulnerabel den comunidad. "Hunto nos lo tin cu combati e fenomeno aki". Boerban a bisa. E tema ta uno hopi amplio y por atende hopi tema cybernetico digital criminal. "Den cada hecho criminal, tin un rastro digital" Boerban a bisa. Ora cu bo usa un telefon p.e. e ta algo digital. Ora cu manda un file via email, e ta algo digital. Y si tur esaki tin relacion cu criminalidad , e ta bira un motibo pa autoridad hudicial pa atende cune y cuminsa un persecucion. E ta un problema mundial, aunke den Caribe e vulnerabilidad ta enorme. No tin frontera fisico, cu ta haci e situacion aun mas grandi. E motibo cu Caribe ta vulnerabel pa tipo di crimenan cybernetico, ta pasobra e infrastructura pa combati esaki, no ta completamente cla ainda y na su lugar. "E tecnologia hopi biaha ta den desaroyo. Pues tin un vulnerabilidad grandi. Y crimen cybernetico ta un fenomeno cu lamentablemente ta aumentando grandemente den nos region" Boerban a finalisa bisando.