Trahadonan na WEB ta sigui den accion !

ORANJESTAD - E welga na WEB Aruba NV ta sigui te ora cu yega na un solucion satisfactorio. Asina trahadonan di e compania a bisa NoticiaCla.com diaranson merdia. Diesdos ora despues cu nan a inicia nan welga, partidonan ta purbando pa haya otro pa resolve e disputa laboral (negociacion di CAO), pero no a logra ainda. Den oranan di marduga a purba, pero no a logra. Esey a pone cu mediado di gobierno a cay aden y tin planea pa continua reunion 2'or di merdia pa wak si partidonan por haya otro. Mientrastanto tur e 200 y pico trahadonan ta keda pafo den accion. Porta central di WEB ta cera, cu ta nifica cu no tin servicio di pago for di awe mainta te proximo aviso. 

INICIO DI E WELGA

Manera cu NoticiaCla.com a raporta caba, trahadonan di WEB a bay den accion diaranson mei anochi, despues cu negociacionnan pa un contracto colectivo laboral (CAO) a tranca mahos. Presidente di sindicato SIWA Erick Henriquez a splica NoticiaCla.com cu nan tabatin lunas ta purba negosha cu gerencia, pero no tabata bay ningun paso dilanti. "Ta pega nos ta constantemente" Henriquez a bisa. Na ultimo, segun Henriquez, gerencia a dicidi di lanta bay for di mesa, cu a pone e sindicato comunica cu e miembronan. E miembronan a opta e ora pa bay den un welga total na e compania di utilidad. 

E CONSECUENCIA DI E WELGA

E accion aki por tin consecuencia pa suministro di awa y coriente, dependiendo con largo e welga sigui. Tin un total di 200 CAO'rs cu lo ta den accion, y ta keda esnan cu ta riba planta cu ta conoci como e IAO'rs  cu lo tin cu purba wanta e planta operacional. "Esey no ta den nos man" Henriquez a bisa. "Awa tin un parti di reserva, kiermen cu awa lo keda un rato ainda, pero e parti di coriente tin posibilidad depende con e situacion ta den e planta, pa sa e resultado". Riba e pregunta ki ora por perde coriente, Henriquez a bisa e portal aki, "Un ora pa otro". 

DURACION DI E WELGA

Henriquez a sigura e portal aki cu tur instancia ta informa, for di director di e planta, te na minister, y mediado di gobierno. Pa loke ta e welga mes, esnan cu mester a subi 12'or no ta subi, y esnan cu ta den planta, pa ley, mester keda traha 16 maximo. Nan ta baha mainta, pero esnan cu tin cu reemplasa nan mainta, tampoco lo subi. Esey ta hinca e planta den un situacion precario diaranson mainta. "Por lo pronto nos ta keda den accion te ora nos mira e pasonan cu lo wordo tuma" Henriquez a sigui bisa. Nan ta premira cu lo tin combersacionan proximamente lo tin cu tuma lugar pa evita mas welga, pero e combersacionan ainda no a conduci na nada productivo. Keda pendiente pa e desaroyo aki.