Na december y no awo por core cu auto atrobe den Caya Grandi

ORANJESTAD - Caya grandi (Caya Libertador Betico Croes) contrario na pensamento otro, no ta habri ainda pa auto pasa aden (anochi). Siman pasa ora cu gobierno a anuncia cambio den maneho di Aruparking pa loke ta e cambio di orario di pago, a haci mencion di habri caya grandi anochi pa auto pasa. Hopi a tuma e comentario aki como un 'done deal',  pero esaki no ta e caso. Ya dialuna anochi autonan a cuminsa pasa anochi den caya grandi, sin cu esaki tabata autorisa. Eman e anochi ey di e anuncionan a 'papia di e posibilidad di habri caya grandi pa trafico despues di 7or di anochi". Esaki sinembargo ta cuminsa den luna di december.

KICO E ANUNCIO TABATA EXACTAMENTE

E anuncio riba e habrimento di caya grandi tabata basta cla. "Nos speransa ta cu si nos por logra den colaboracion cu DOW pa purba esaki den luna di december despues di 7'or di anochi, te un cierto di ora di mainta", Eman a bisa na tal ocasion. Pues no cu e ta habri for di dialuna ultimo caba. Esey ta nifica cu esnan cu haci esey awor, lo por haya un multa di polis, mirando cu tin borchi di 'verboden' na entrada di e caya grandi, cu ta significa (ainda) cu no tin pasada di trafico di motor den e caya. 

PAKICO HABRI CAYA ATROBE

Durante e anuncio, a mustra pakico kier habri e caya atrobe pa trafico, siendo cu algun tempo pasa a cera esaki pa solamente laga e tram pasa. Pero critica di comerciantenan den caya a pone cu ta evaluando pa cambia esaki bek, pero pa cierto ora di dia. Eman, mirando cu awor tin rails pa tram, a mustra cu tin retonan pa cu habrimento di caminda pa auto atrobe. "E infrastructura nos tin cu bay mantene hopi, tirenan ta pasa pero e ta traha pa carg'e si. Naturalmente e ta bay tin su impacto" Eman a bisa. Tin cu mira ainda si e cambio aki lo funciona y si e lo haci un diferencia den actividadnan den centro di ciudad. "Hopi tienda a puntra pa esaki" Eman a sigui bisa.