Categoria 1 di aeropuerto di Aruba no ta na peliger

ORANJESTAD – Ningun momento aeropuerto su categoria 1 ta na peliger. Minister di transporte Otmar Oduber a reacciona serca NoticiaCla.com diahuebs merdia, indicando cu tur e noticianan aki, incluyendo cu e lo a nombra sr Nilky Kock como ‘Manager Luchtverkeers Beveiliging’ na aeropuerto ta falso. “Sr Kock ta den management team di Directie Luchtvaart, y no a wordo nombra den e funcion menciona” Oduber a sigura NOticiaCla.com. Informacion cu tabata circula ta bisa cu cualkier persona cu wordo nombra di e forma ey, ta pone cu e categoria di aeropuerto segun regla di ICAO ta na peliger. Algo cu e mandatario ta desmenti rotundamente. De hecho, e nombracion di un funcion asina no ta afecta aeropeurto pa nada y como tal no por tin efecto riba su status of categoria, segun Oduber. E motibo di henter e precupacion aki, ta pasobra segun regla di ICAO, si apunta cierto personanan cu no ta cualifica den funcionan clave di aeropuerto, esaki ta viola e regla di ICAO y como tal ta duna e instancia mericano e motibo pa baha e rating di e aeropuerto en cuestion. Y senor Kock -segun informacionan cu tabata circula-, lo no ta cualifica. 

E la mustra si cu Kock ta interesa den e funcion di e NV nobo na Directie Luchtvaart pero cu no tin solicitud pa esaki ainda. Pero lo resto no ta cuadra segun e mandatario. “ICAO no tin ningun restrincion pa cu esaki. Un manager di cualkier manager no tin mester di e rekisito manera ta wordo bisa” Oduber a bisa. E hecho cu mester ta un controlador aereo certifica pa bo por bira manager, no ta berdad. “E ta un stunt politico di hende cu ta purba bruha tera” Oduber a bisa. Loke si e sigura ta cu si e por nombre, e lo nombre 10 biaha pasobra segun Oduber, Kock ta sigur capabel pa e funcion ey.