Hulanda no a screen Boekhoudt y Aruba a tarda cu proceso

DEN HAAG - Cu cos no a bay segun e proceso di nombracion di e Gobernador nobo Alfonso Boekhoudt ta berdad, pero tur esey tabatin su motibo segun minister hulandes Ronald Plasterk. Asina e minister hulandes Ronald Plasterk ta contesta lider di partido hulandes den tweede kamer, D66 Alexander Pechtold den un carta. Plasterk ta admiti e.o., y sigura cu ta conseho di minister di Reino a dicidi cu e mes (Plasterk) por a nomina sr Alfonso Boekhoudt pa Gobernador, serca S.M. Rey Willem Alexander, y cu no a screen Boekhoudt awor pa e funcion di Gobernador. Di otro banda Plasterk ta recorda tambe cu Aruba a faya y cu esey a conduci na e actuacion di Hulanda.  "Den futuro lo prefera pa 'den cuadro di e contenido di e 'notitie', tin un acuerdo cu e pais en cuestion pa tin un nombracion cu ta conta cu un sosten amplio di e pais en cuestion", Plasterk ta sigui bisa.   

TARDANSA

Plasterk ta referi constantemente na e notitie (y no un protocol) di aña 2000, cu claramente ta deliña e procedura cu partidonan a acorda rond di nombramento di e un gobernador y esun interino. Den e mesun notitie, Plasterk ta recorda cu ta para claramente cu por lo menos 6 luna prome cu e termino di gobernador den funcion termina, mester cuminsa cu e proceso pa selecta un persona. Algo cu segun Plasterk, Aruba no a cumpli cune. Aruba, segun e mandatario hulandes, a tarda pa bin cu su lista, conforme e 'notitie'.  Ademas, contrario na pensamento, e notitie no tin base legal (no ta ancra den ley) y cu statuut ta mustra cu conseho di minister di Reino por nombra gobernador. 

SCREENING

Plasterk a admiti tambe, contestando e 5 preguntanan di Pechtold, cu no tabatin screening awor haci pa Boekhoudt pa e bira Gobernador. Algo cu segun e notitie, mester sosode pa e pais unda cu e Gobernador mester funciona. Di otro banda, Plasterk ta mustra cu conseho di minister di Reino, a basa nan mes riba e resultado di screening cu si a tuma lugar ora cu Boekhoudt a keda apunta como minister plenipotenciario, y cu esey ta mas cu suficiente awor. Pero, den mesun rosea, ta spera cu henter e proceso den futuro sigui e proceso manera dileña den e notitie.