Grupo Turco ta menasa di bin busca nan avion confisca

WILLEMSTAD –   Un grupo Turco a menasá cu nan lo bin cue nan avion cu ta confisca na aeropuerto di Còrsou. Asina e vespertino La Prensa a publica den nan edicion ayera. NoticiaCla.com ta reproduci e articulo aki cu permiso di e vespertino. Ta trata di e avion riba cua tabata na punto di hiba un lote di cocaina pa exterior recientemente. Den e caso aki tin diferente persona detené. 

Nos informantenan cu a pidi pa no identifica nan a bisa, cu e mensahe a drenta siman pasa. Mesora a tuma medidanan di precaushon i a informa personal di parti di aeropuerto pa nan tin cautela. Diferente miembro di e personal a confirmá e informashon aki, bisando cu nan ta trahando ”morto di miedo”. Ta p’esei na momento cu tabatin e anuncio di un maleta bandona na aeropuerto, hopi di nan a core bai for di e lugá diabierne último. “Nos a haci loke nan a bisa nos. Core”, asina nan a indika. 

Segun e vespertino LA PRENSA a informa den e caso di e avion aki tin diferente persona detené, entre nan di nacionalidad Turko, Aleman i un Yu di Corsou. LA PRENSA a haña mas informashon di e menasa, pero den e cuadro di e situashon serio no ta considera oportuno pa publica e informashonnan delicado aki.

LO BENDE AVION 

CAP, responsabel pa aeropuerto tambe a duna informashon riba e caso cu a presenta, pero no a duna un informashon riba e informashon sensitivo ku tin ku e grupo a hura ku nan ta bin cue nan avion bek. Ministerio Públiko a informa, cu komo parti di e accion di confiskashon di e avion, droga i tambe un arma di candela i handschoen, lo bende e avion. E fondonan ku genera cu benta di e avion lo bai pa fondo di criminalidad.  

fuente: Vespertino La Prensa foto cortesia Mariano Heyden.