OM: Sospechoso Stamper a tene insuficiente cuenta cu su malesa

ORANJESTAD - Ministerio Publico a tuma nota di publacionnan recien den prensa relaciona cu e sentencia di Corte Superior contra e sospechoso I.T.M. Stamper.

Señora Stamper a wordo haya culpable riba 7 di november ultimo di dood door schuld in het verkeer (homicidio culposo den trafico) y a wordo condena pa un castigo di seis luna condicional, tempo di prueba di dos aña, 240 ora di servicio y tres aña di prohibicion pa stuur auto. Stamper a, como chofer di un auto, causa un accidente di trafico riba 3 di maart 2014 riba spiraalrotonde, a consecuencia di cual un persona a fayece. 

E caso a sirbi riba 11 di juni 2015 den Corte den Prome Instancia. Tabata e dia ey cu e sospechoso a duna di conoce pa prome vez cu e ta sufri di epilepsia. Ministerio Publico a pidi Huez pa para e caso, pa por investiga e hecho nobo aki relaciona cu e condicion medico di señora Stamper.  Huez no a haya bon pa para e caso, y a dicidi pa declara e sospechoso liber. 

Ministerio Publico a bay den apelacion contra e decision aki, pasobra Ministerio Publico ta hiba e punta di vista cu si abo como participante den trafico ta sufri di un malesa cu por seriamente influencia bo comportamiento den trafico, bo tin cu tuma medidanan di precaucion contra esey (por ehempel, dor di bebe bo remedinan of door di no stuur auto bo mes). Sino bo por trece seguridad di trafico den peligro cu posibelmente consecuencianan hopi serio pa un persona, manera a sucede tambe den e caso aki.

Corte Superior di Husticia ta comparti e punto di vista di Ministerio Publico. Corte Superior a huzga cu señora Stamper como participante den trafico a tene insuficientemente cuenta cu su malesa y a tuma insuficiente medidanan di precuacion, y pesey e ta carga responsabilidad pa e accidente. Mientrastanto e sospechoso a bay den casacion contra e decision di Corte Superior di Husticia. FOTO ARCHIVO NOTICIACLA