Aruba Airport y Rode Kruis Aruba a formalisa nan aliansa

ORANJESTAD - Dia 14 di november Aruba Airport y Rode Kruis Aruba a firma un acuerdo cu ta delinea un Aliansa Strategico entre e dos partidonan. Aruba Airport tin añanan ta contribui na e asociacion di Rode Kuris Aruba y di e forma aki Aruba Airport y Rode Kruis a formalisa mas ainda nan aliansa pa e añanan benidero. Rode Kruis semper a sa di sostene Aruba Airport cu nan esfuersonan ora di calamidadnan operacional y Aruba Airport como aliado strategico kier yuda Rode Kruis yega na nan metanan na un manera structural. Pa Rode Kruis tawata presente Sr. Ruiter, Tesorero di Rode Kruis, y Sr. La Haye, Director di Rode Kruis. Na nomber di Aruba Airport Sr. Fazio, CEO y Sra. Anthony, CFO a firma e aliansa.

“Como Aruba Airport nos ta sumamente orguyuso di por ta un aliado strategico pa Rode Kruis Aruba y di por contribui asina na nan esfuerzonan den comunidad Arubano ora di eherce nan trabou ora un calamidad presenta”, segun Sr. James Fazio, CEO di Aruba Airport.”Nos ta spera cu otro companianan lo sa di tuma un ehempel na e aliansa importante aki cu nos a sera cu Rode Kruis”. "Pa nos organisacion ta importante pa por conta cu companianan cu ta sostene nos trabou. Nos t'ey pa yuda, sin distincion di raza, religion, nacionalidad of opinion politico", manera indica dor di Sr. La Haye, Director di Cruz Cora Aruba. “Cruz Cora Aruba tey pa yuda esun mas vulnerabel. Masha danki Aruba Airport pa e sosten".