Eman a palabra 'declaracion' cu Plasterk prome cu subi avion pa Hulanda

ORANJESTAD/ DEN HAAG - Pa prome minister Mike Eman (y colega Sevinger) por a biaha recientemente pa Hulanda pa topa colega (Ronald Plasterk), nan (Aruba y Hulanda) mester a formula y aproba e 'declaracion conoci' prome, sino lo no tabatin encuentro na Hulanda. Fuentenan cerca di e proceso a confirma na NoticiaCla kico a pasa realmente recientemente relaciona cu e caso di nombracion di Gobernador nobo y e intento di gobierno di Aruba pa revoca esaki. Investigacion y confirmacion ta mustra pues cu e declaracion presenta 'despues' di e combersacion entre Plasterk y Eman tabata cla traha prome cu Eman y Sevinger a subi avion rumbo pa Hulanda.

CARTA FUERTE

E situacion na Aruba tabata basta tenso den seno di partido despues di e nombracion 'sorpresivo', unda cu tabata formula con pa atende cu e problema aki cu Hulanda. Esaki a durante te hasta prome cu e biahe. Tur cos a cuminsa cu e formulacion di e carta fuerte cu Eman a manda pa colega Rutte un siman prome di nan biahe. Uzando palabranan pisa manera 'ta exigi revocacion di nombracion di Gobernador Alfonso Boekhoudt', Eman kier a mustra cu Aruba no ta sucumbi pa Hulanda y cu nan no tabatin pensa di tuma esaki. Sinembargo NoticiaCla.com tin confirma cu den seno di partido, esaki tabata un problema riba cual mester a debati basta. Finalmente a bay di acuerdo pa manda e carta aki, y tur hende a para tras di e carta. Tur hende tabata consciente cu pa por a logra algo, e partido mester tabata uni riba esaki. Y esey a logra tambe finalmente. 

CONTACTO CU PLASTERK

Despues a sigui e intento pa set up un reunion entre Eman y Plasterk. Tabata riba e diadomingo cu a sigui, cu Eman a haci varios intento pa localisa Plasterk, sin exito. A sigui cu contacto cu un amigo di partido, vice presidente di Raad van State, Piet Hein Donner. Durante e combersacion cu Donner, Eman a compronde e ora di nan amigo cu , mientras cu Hulanda no a actua elegante, no tabatin nada contra ley of ilegal cu Hulanda a haci cu e nombracion di Boekhoudt. Pues cu hasta Raad van State no a wak nada malo cu esaki. Despues a ofrece pa busca contacto cu Plasterk, cual contacto porfin a logra. Tabata durante e contacto ey cu Plasterk a informa Eman di e situacion, y cu Plasterk a informa Eman cu no tabatin problema pa ricibi e mandatario di Aruba, pero cu un condicion. Eman mester a formula (hunto cu BZK), e reaccion ya conoci, prome cu Eman por a subi avion rumbo pa Hulanda. Cu e carta aproba y formula, Plasterk lo a topa Eman y acepta e loke a wordo formula den e carta. Una bes cu esey a keda formula, Eman a subi avion dialuna, rumbo pa Hulanda. Esey ta splica tambe e cambio di tono cu Eman a hiba durante un entrevista prome cu Eman a subi avion rumbo pa Hulanda. E tono tabata mucho mas trankilo, cu palabranan cuidadosamente formula, cu ta mas den direccion di estrecha lasonan atrobe. No por a haci otro, pasobra Eman tabata sa kico tabata sper'e na Hulanda. E tono tabata uno cu Eman tabata custumbra di tin den momentonan 'normal', y nada di e tono fuerte cu e carta cu el a manda apenas algun dia prome. 

CARTA CONOCI

Pues awor ta resulta cu henter e 'operacion aki' tabata fabrica, cuidadosamente formula y prepara pa asina tur hende sali bon for di esaki. E realidad ta pues cu e loke a sosode, tabata puramente pa scapa cara na Aruba, pero no necesario, pasobra e carta tabata cla, prome cu Eman a subi avion.