Amigoe: A revoca autorisacion di inspector di remedi

ORANJESTAD — Minister di salud Alex Schwengle a cay aden na Inspectie Geneesmiddelen y a revoca e autorisacion di firma di e inspector Gregory Edmund Fung-A-Fat. Asina e vespertino Amigoe ta raporta den nan edicion di awe (dialuna). Motibo di e revocacion di autoridad, segun Amigoe, ta conflicto di interes. Fung-A-Fat ta sigura sinembargo cu ainda e tin autorisacion pa firma, y cu no tin nada preto riba blanco, y cu e ta sigui eherce su funcion como inspector normal ainda.  

Inspectie Geneesmiddelen ta supervisa e suministro di remedi na Aruba. Aki e ta trata cu dos partido, esta e boticanan cu ta entrega remedi na Arubianonan, y e importadonan di e remedinan. Un di e importadonan ta Island RX N.V., funda na 2003 cu como directornan Gregory Edmund Fung-A-Fat y su tata cu ta hiba e mesun nomber. Como inspector, Fung-A-Fat pues ta controla su propio negoshi. Aunke cu KVK ta suministra e informacion aki publicamente, Edmund ta desmenti na Amigoe cu ta trata aki di su negoshi. “Ta trata di un negoshi di famia y e ta inactivo mas of menos 8 caba". Amigoe sinembargo ta raporta cu nan tin un factura den nan poder, di Island RX N.V. na Botica di Servicio na Noord (data 8 di november 2016), unda cu ta mustra cla cu e negoshi ta activo.  

NEGOSHI DI COFFIE

E conflicto di interes segun Amigoe, no ta caba aki. For di un inscripcion na Camara di Comercio ta resulta cu su casa Patricia Gail Mitton ta inscribi cu e compania  S.N.T. Holding. E compania ey ta maneha e negoshi di coffie, Coffee Spot, situa den un edificio di botica na San Nicolas di un di e importadornan mas grandi di remedi, esta Visser Holding Aruba. Banda di esey, Fung-A-Fat ta boticario tambe di profesion, part time na Imsan, tambe na San Nicolas. Y ey tambe e ta controla como inspector di remedi. Den tres forma, su actividadnan asina ta bira conflicto cu su funcion como supervisor riba e suministro di remedi.  

E vespertino ta sigura cu nan a tuma contacto cu e director di Imsan Joël Rajnherc cu e pregunta cu si e ta na altura di e trabounan 'combina' aki. Rajnherc ta laga sa cu e 'no kier duna comentario pasobra e no sa e backround di e storia'. Edmund mes ta raporta cu enberdad ta huur un edificio como lugar di bende koffie, pero cu esaki ta los di e botica y 'cu no por papia aki di conflicto di interes'. Riba e punto cu e ta traha na Imsan como boticario, e ta bisa: "Mi a wordo pidi pa esaki na 2008 pa minister di salud Booshi Wever (e tempo ey MEP), pa yuda cu Imsan. Desde e momento ey nos a haci palabracion cla riba e trabounan. Si mi tin cu firma algo pa Imsan, e ta wordo controla pa un di dos inspector". Ta berdad cu minister di salud Booshi Wever pa medio di un decreto ministerial a dun'e permiso pa eherce e funcionan aki como part time boticario na Imsan.  Riba e hecho cu e mes ta doño di un negoshi di importacion y cu, via Coffee Spot, tin un relacion cu e importador/botica Visser, no tabata conoci pa e minister. 

SUSPENSION

Pa medio di un di e boticanan, Botica di Servicio, e actividadnan conflictivo a wordo treci na cla den un reunion dia 27 di october unda cu tambe minister di salud Schwengle a participa. Durante e reunion aki, e mandatario a revoca e derecho di Fung-A-Fat pa firma en espera di un investigacion di e actividadnan, segun Lennert van der Poel, gerente general di Botica Di Servicio. "Durante e reunion e minister a bisa te hasta cu su colega (di Fung-A-Fat)  pa e motibo aki no por a tuma vakantie".  Riba e medidanan contra e inspector mes, e no kier a comenta. "Esey ta asunto di inspectie y e minister. Naturalmente e minister mester actua ora cu ta trata di conflicto di interes". E medida di minister tin impacto si riba e trabou di e botica. "Nos ta depende di Inspectie Geneesmiddelen. Si un cierto remedi no ta disponibel riba e isla, nos tin cu busca esaki den exterior. Nos por haci esey hopi lihe, pero nos por haci esey solamente cu permiso di inspectie. Esey ta tarda hopi y e pashent ta e victima di esaki sin cu tin mester. Awor nos tin un situacion unda cu un inspector no tin autorisacion pa firma, y e otro no ta riba e isla. Mientrastanto tin pashent si cu ta wardando riba su remedi".  

Fung-A-Fat mes ta sigura cu ainda e tin permiso pa firma y cu ta operando cu full autorisacion como inspector. "E ta un rumor. No tin nada preto riba blanco ak, y mi no a tende nada di minister. Mi ta na trabou y awe mainta ainda mi a sinta cu minister na mesa".

Inval

Un siman despues di e desicion di minister, Botica di Servicio a wordo confronta cu un redada (inval), unda cu Inspectie Geneesmiddelen a haci un control extenso di e administracion y e remedinan. Si tin un relacion entre e redada y e suspension, van der Poel no por bisa. " E ta fastioso, e ta stroba nos operacion, pero nos tin nos administracion na ordo y aki nada iregular ta sosode. Nos no tin nada di sconde". E vespertino Amigoe ta bisa na final cu minister Schwengle no tabata disponibel pa reaccion ora cu e edicion di awe a cera. 

Fuente: Vespertino Amigoe.