Gobierno ta delibera cu Insel Air riba situacion di cash flow

WILLEMSTAD - Compania di aviacion Insel Air a aserca gobierno cu e peticion pa delibera tocante posibilidadnan pa solucion di e situacion preocupante di cash flow pa e compania aki. Asina gobierno di Corsou a informa oficialmente den un comunicado. Segun e comunicado, Insel Air a duna di conoce cu e situacion aki ta consecuencia di no por ricibi pago di un debe di aproximadamente US$ 100 miyon di pais bisiña Venezuela. Prolongacion di e situacion aki no ta deseabel y ta atacha e maneho diario di Insel Air. 

Insel Air ta e proveedor mas importante di e coneccion aereo pa y for di Corsou. Pa gobierno, un bon coneccion aereo pa destinacionnan importante, ta balioso. Alabes ta balioso pa un bon suministro di servicio cu por ofrece transporte aereo amplio.  

Un coneccion aereo defisiente por tin consekuensianan desastroso pa nos economia y pa e motibo aki mester keda evita mas tanto cu ta posibel, segun gobierno di Corsou.

Pa por a entama e combersacion cu Insel Air, Conseho di Minister a forma un Comision di Sabionan, bou di guia di sr. Etienne Ys. E otro miembronan di e Comision ta experto riba e tereno di aviacion y accountancy.

E Comision lo investiga estado economico di e compania mas profundo hunto cu Insel Air i lo delibera tocante posibel solucionnan. Insel Air a priminti di lo duna su cooperacion completo pa cu esaki.  

E comision ta raporta na un stuurgroep di Conseho di Minister cu ta consisti di Minister di VVRP (Verkeer, Vervoer en Ruimtelijke Planning), sra. Suzy Römer, Minister di Finansa, sr. José Jardim y Minister di Desaroyo Economixo, sr. Eugène Rhuggenaath. 

E comision ta saca un relato denter di tres siman di su conclusionnan y consehonan. A base di esaki gobierno lo palabra pasonan cu mester keda tuma hunto cu Insel Air. Foto cortesia CuracaoChronicle.