De Meza ta haya cartera di turismo y Arends di economia

ORANJESTAD - Awe mainta gobierno ta anuncia su candidato nobo pa minister di Turismo, y tambe pa Economia mirando cu mester a 'switch' cartera cu minister pa por a keda cla. Mientras cu gobierno no a informa nada oficialmente, otro medionan local ta raporta cu gobierno a keda cla cu e posicion di minister pa turismo cu mester bira Mike de Meza, y cu Richard Arends ta tuma e cartera di economia di de Meza, como un switch. Gobierno no a confirma esaki ainda, pero si a anuncia un conferencia di prensa pa awe mainta 11'or dilanti despacho di Gobernador. Esaki ta pa anuncia e candidaturanan di ambos persona. 

NEGOSHANDO SIMAN PASA

Manera NoticiaCla.com a raporta siman pasa ainda, gabinete Mike Eman II tabata den proceso ainda pa haya un persona pa reemplasa ex minister Otmar Oduber. Cos tabata bayendo mas dificil cu a kere inicialmente, y segun fuentenan yega na e proceso, a pone un deadline pa siman pasa diaranson pa keda cla cu e proceso, aunke e proceso pa reemplasa e ex mandatario no tabata mara na tempo. NoticiaCla.com a compronde e momento ey caba cu Gabinete tabata na mesa ainda cu e candidato Richard Arends pa convence pa tuma e posicion di minister. No tabata conoci ainda cua e lo tuma, y akinan e discusion lo ta pega. 

PLAN B

Dado caso Arends no a tuma e funcion, gabinete lo a pasa pa 'distribui' e respectivo carteranan entre e varios ministernan di e gabinete. Esey no tabata e intencion inicial, manera cu prome minister Mike Eman a anuncia siman pasa diabierna. E intencion tabata pa no duna e actual ministernan mas encargo, sino di busca un persona 'di afo' pa asumi e funcion aki. 

NINGUN HENDE CU TA RIBA LISTA BERDE

Un di e criticanan den comunidad ta pakico gabinete no ta uza un di e personanan cu ta riba e lista di e partido berde, of ta saca un persona for di fraccion di AVP den Parlamento y dun'e e encargo aki. E critica ta cu e plan di gabinete Mike Eman II kier implementa, ta duna esnan riba e lista original, un 'brevet van onvermogen' y no ta duna nan e balor cu nan merece, y cu nan 'ta bon pa ta yena lista si' pero no ta bon pa un funcion manera di minister. Di otro banda, ta prerogativo di gabinete pa apunta un persona cu nan ta determina cu ta cualifica pa e respectivo funcion.