Croes: CITGO Aruba lo por cuminsa emplea trahadornan local e siman aki

ORANJESTAD – CITGO Aruba lo por cuminsa emplea trahadornan local e siman aki. Asina minister di labor Paul Croes a informa den un comunicado. Despues di e sesion den cual a trata e prespuesto di e minister, ela indica cu un siman clave ta habri dialuna cu un reunion entre su persona y director di CITGO Aruba. E reunion lo tin como tema principal e tumamento di trahadornan Arubiano den servicio di e refineria. 

“E proceso di inspeccion ta bay inicia. Tin algun trabou cu ta preparando pa tuma luga, pero directamente no a cuminsa emplea ningun hende ainda; ta premira cu den transcurso di siman aki lo inicia,” asina Minister Croes a declara.

E mandatario a contesta preguntanan por escrito y verbal haci dor di Parlamentario di tur fraccion, haci den e prome ronda. Aki un biaha mas, Minister Croes a reitera su posicion cu como Minister di Labor di Aruba, ta e ciudadanonan di Aruba ta su prioridad na tur momento. “Nos a pone enfasis cu e prome yama pa traha den refineria nos hendenan y actualmente peticionnan ta wordo scrutina pa entrega na refineria.”

P'esey ministerio di labor a cuminsa cu e proceso di CITGO Desk, pa tin un base di data di nos hendenan cu por entrega na ehecutivo di Citgo pa mustra nan cu nos tin e hendenan capacita pa traha. “Mientras cu nan no haya trabou, no ta bay duna permiso na hende di afo pa haya trabou,” asina Minister Croes a bisa categoricamente.

Actualmente ta asina leu cu a inicia cu e proceso di inspeccion. Mas cu 100 trahador di Valero a pasa pa CITGO Aruba y tambe tin e trahadornan cu a pasa pa Refineria di Aruba (RDA).  Croes: “Nos a scucha ya caba for di e lider sindical cu tur esaki a bay na un manera corecto, manera nos a bisa cu e lo bay.”