Wyatt Ras :Lider di un crèche of presidente di Parlamento

ORANJESTAD - Presidente di Parlamento Wyatt-Ras ta enfatisa cu e no ta lider di crèche cu tin cu pone parlamentarionan sinta keto of manda nan para den huki. Wyatt Ras a reacciona diabierna anochi riba e incidente cu a sosode e simana ki entre dos parlamentario durante tratamento di presupuesto. Un di e criticanan ta cu Wyatt Ras no a actua y a laga e dos personanan aki sigui insulta otro. E ta lamenta cu e noticia ey a haya mas atencion cu e tratamento mes di presupuesto. Mes momento e presidente ta mustra cu te awor, e tratamento di e presupuesto a bay 'vlot' y ta spera cu e por sigui asina otro siman tambe. 

E INCIDENTE

Wyatt Ras a haci mencion di e  discucion cu a tuma lugar entre dos parlamentario unda cu un a tira palabra pa e otro y e otro a reacciona y asina a start un tiramento di palabra pa otro. E presidente kier duna contesta na tur esnan cu enbez di wak kico a pasa a skohe pa critica e presidente den medionan social. E ta reitera cu cada parlamentario ta responsable pa su comportacion y actitud den Parlamento. " Cada parlamentario ta elihi dor di pueblo di Aruba pa representa nan. E ta enfatisa cu e no ta lider di crèche cu tin cu pone parlamentarionan sinta keto of manda nan para den huki. " Esun cu tira palabra pa otro por spera di haya contesta di e otro". Wyatt-Ras no ta aproba e forma aki, sinembargo e no ta deal cu mucha sino cu adultonan cu mester sa nan limite y para responsable pa nan actonan. E ta recorda tur hende cu e mes a wanta hopi palabra di abuso no mucho tempo pasa den parlamento y e no a tende niun hende sali na su defensa. E mes a sabi di maneha e situacion, sin cu niun hende a ser atendi ariba esaki. En bista cu reunionnan ta ser televisa henter pueblo por wak kico ta pasa y ken ta haci kico. Ademas un medailla semper tin dos banda. " Natural ta keda si e actitud di e parlamentario ta hopi ofensivo of extremo tin cu actua segun reglement van orde ta indica y hasta por bai over na saca miembronan di parlamento for di sala" Wyatt a bisa

E TRATAMENTO DI PRESUPUESTO

Pa loke ta e tratamento di presupuesto mes, Wyatt-Ras ta declara di ta satisfecho cu tratamento di presupuesto di pais Aruba ta bai “vlot”. Dicho presupuesto e anja aki a keda entrega na tempo na Parlamento segun nos Constitucion y lo kier trata esaki tamb na tempo. Segun Wyatt-Ras e sistema cu a skohe pa trata e presupuestonan un pa un y cu cada parlamentario tin nan 90 minuut den promer tanda y 45 minuut den e segunda tanda pa haci uzo di esaki manera cu nan ke durante e tratamento y cu griffier ta tene conteo di esaki ta un forma cu ta cayendo na agrado. Ademas Wyatt-Ras hunto cu griffier ta conta e cantidad di preguntanan haci y ta calcula cuanto minuut/ora e minister tin mas o menos pa contesta pregunta. Den pasado Parlamentarionan ta papia tanto minuut mientras ministernan ta keda papia horanan den Parlamento. E biaha aki ministernan tambe tin cu tene nan mes na cierto limite di tempo pa nan discurso. A inicia cu tratamento dialuna y ya caba a finalisa 6 di e 9 ministerionan, esta di Finanzas, Economia, Justicia, Infrastructura, Asuntonan Social y Turismo. 

OTRO SIMAN

Pa otro siman ta keda Salubridad, Ensenjanza y Asuntonan General. Por spera cu e ultimo presupuesto lo capta mas atencion y por na final lo vota ariba e presupuesto.   Wyatt-Ras ta spera cu otro siman bai manera eficiente manera e siman aki y cu pronto nos por keda cla pa asina tur e departamentonan di gobierno y fundacionnan por haya nan financiamento pa nan por haci nan trabou/ofrese servicio den bienestar di nos comunidad.