Staring: No tin nada oficial riba e droga 'strawberry quick'

ORANJESTAD - Departamento di Salud no a ricibi ningun confimacion riba e caso(nan) di e (supuesto) droga 'nobo' cu tin riba mercado, bou di e nomber di Strawberry quick. Asina director di departamento di salud Jerry Staring a bisa NoticiaCla.com. E droga nobo ta bin den un forma di lolipop cu color y tin smaak di strawberry cu lo ta wordo bendi cu muchanan na scol. Pa varios dia(nan) caba un mensahe riba e.o. whatsapp ta circulando, alertando mayornan di esaki. 

NADA OFICIAL RICIBI

Director di departamento di salud Jerry Staring a confirma na NoticiaCla.com di ta na altura di e mensahe cu ta coriendo rond, pero no a haya confirmacion oficial di e droga nobo aki. "Nos no a ricibi ningun confirmacion riba e caso aki di ningun di nos partnernan di salud", Staring a sigui bsa. Como tal nan no por duna ningun otro comentario riba e tema aki. "Mi a tende di dje, pero nada oficial", Staring a finalisa bisando. 

E DROGA

Segun e mensahe cu ta bayendo rond, e droga 'ta un tipo di mangel manera cristal cu ta bay rond cu ta parce chupabebe of lolipop di strawberry!! E mangel aki ta haci un zonido cu ta zona manera "scuma" (sizzel) y ta "kibra habri" (pops) den bo boca. E ta hole tambe manera strawberry y e ta wordo reparti na muchanan den cura di scol nan. Nan ta yame strawberry meth of strawberry quick. Muchanan ta consumiendo e mangel aki pensando cu ta mangel y mester a wordo hiba urgentemente hospital. E ta bin na sabor di chocolati pindakaas, cola, cherry, grape y appelsina", e mensahe ta sigui bisa. No ta descarta cu a manda esaki for di Corsou, pa alerta esnan na Aruba di e practica aki. Por lesa e mensahe cu ta wordo manda rond, den su forma original aki.