AHATA: Vigilando efecto Donald Trump pa turismo Aruba

ORANJESTAD - E gremio hotelero Aruba Hotel & Tourism Association (AHATA) ta vigilando e situacion politico recien na Merca, cu eleccion di Donald Trump como presidente Mericano. CEO di AHATA Jim Hepple a confirma na NoticiaCla.com cu nan ta preocupa cu e consecuencia cu Trump como presidente por tin, y mas ainda su impacto pa turismo di Aruba. E accionan e.o. anuncia pa Trump pa e prome 100 dia di su presidencia lo tin un impacto significativo riba e dollar Mericano, manera cu Gran Britania a sinti ora di Brexit. Y ta premira un recesion acelera cu ta nifica cu menos turista Mericano lo bishita Aruba. Mes momento Hepple ta bisa cu mientras cu esaki lo ta e efecto mas bien pa 2018 bay ariba, tin cosnan cu lo afecta nos ya caba den 2017. 

ALGO POSITIVO PA ARUBA

Mes momento Hepple ta referi na e posicion di e republicanonan (partido di Trump) riba e desaroyo na Cuba, cu ta hopi diferente cu esun di Obama. Obama tabata haci tur cos pa habri Cuba pa Mericano por biaha como turista, Trump ta pensa diferente. "Ta hopi probable cu Trump lo 'slow esaki down' cu ta cambia e panorama riba e parti aki, esta e impacto di Cuba riba Caribe. Y esey por ta algo positivo Aruba pasobra esey ta nifica cu nos lo no mester wordo confronta cu e shift di trafico Mericano pa e isla Cubano, en bes di Aruba". Henter e asunto ta cuestion di inseguridad segun Hepple. Y den mundo di turismo, inseguridad ta e cos mas pio cu por tin. 

CONFIANSA DI CONSUMIDOR

E efecto mas directo cu nos tin cu tene cuenta cune segun Hepple, ta confiansa di consumidor. Esaki lo keda afecta hopi lihe, pasobra hende no ta sigur kico lo sosode. "Esey ta nifica cu lo tin un 'retraso' den reservacion (di pasashi)" Hepple ta sigui bisa. Algo cu Aruba a experencia caba e aña aki. Hendenan ta book nan pasashi mas cerca di e dia di biahe, compara cu antes. Esey lo bira mas pio ainda den 2017. "Esey ta nifica cu ta bira mas y mas dificil pa pronostica patronchi di negoshi (di turismo). Bo mester warda, warda y warda pa (e biahero) haci su reservacion" e CEO ta bisa.