Rapport ambiental positivo pa proyecto Isla di Oro

ORANJESTAD - E resultado di e investigacionnan ambiental haci riba e proyecto hotelero miyonario di Isla di Oro, ta bisa cu ta posibel pa convivi turismo cu e ecosystema. "Y cu si e ta wordo haci den un forma responsabel, por tin no solamente un proyecto unico na Aruba, pero den Caribe". Asina e representante di Grupo Isla, Franz Sydow a participa diahuebs durante un presentacion amplio na comunidad riba e resultado di varios investigacion ambiental haci. Mester bisa si cu no a mustra prensa e documentonan ainda si. Ta spera cu esaki por sosode pronto.

SOSTEN PA PROYECTO 

Cu un suma mara di 45 miyon dollar, e grupo kier sigura cu tur cos ta bayendo bon, y cu tur hende ta involucra, den un forma mas responsabel posibel. Den un video cu nan a presenta diahuebs atardi, por mira varios comentario di expertonan, y tambe combersacion cu algun habitante di e bario di Pos Chiquito, cu ta sostene e proyecto. 

EXPERTONAN PRESENTE Y AUSENCIA DI NGO'S

Basicamente un total di 9 experto riba varios tereno ambiental a informa cu no tin nada robes cu e proyecto Isla di Oro y cu no ta mira peliger pa daño na e area. Cu esaki ta atende cu e preocupacion di e gruponan ambiental na Aruba. "Loke nos kier a haci ta mustra e resultado ambiental pa nan tur por a duna nan feedback dilanti e grupo di experto cu nos tin, no solamente na Aruba pero internacional tambe" Sydow a caba bisa. Lamentablemente segun Sydow, net esnan cu a spera cu mester a bin, a briya cu nan ausencia. "Nos ta hopi responsabel den e parti ey, y lamentablemente nan no a bin". Manera NoticiaCla.com a raporta caba mas prome, un di e ambientalistanan mas vocal, Greg Peterson a mustra su desaprobacion pa e proyecto, y cu e no ta sostene esaki ni maske kico wordo bisa of haci. Peterson mientrastanto, no a presenta durante e presentacion di awe.